Ilusio handiz, eta kezkatuta

  • Urte bukaera beroa izango du Gaztezulo aldizkariko lantaldeak. Hamargarren urteurrena ospatzeko azken ukituak ematen ari dira, eta era berean, Eusko Jaurlaritzaren diru-laguntzen zain daude, Gipuzkoako Foru Aldundiak laguntza %80 murriztu eta gero.
gaztezulo
Dani Blanco
Urteurrena har dezakezu munduko ilusio guztiarekin, eta pentsatu hau egingo dugula eta bestea, baina ez dago nondik atera dirua”. Igone Fernandez erredakzio burua Gipuzkoako Foru Aldundiak aurten diru-laguntzetan egindako murrizketaz ari da. Iaz 50.000 euro inguru jaso zituen Euskal Herri osoan zabaltzen den Gaztezulo aldizkariak eta aurten udaberrian jakin dute 9.000 euro pasatxo baino ez dutela izango, %80ko murrizketa. Raul Perez zuzendariak aitortu digu norabidea galduta geratu zirela diru-laguntzen albistea jakinda, urteurrena gainean zutela. Urteurrena ospatu ala ez, zalantzan jarri zuten, eta azkenean, aurrera egitea erabaki zuten, “festa egingo dugu, eta gero gerokoak”. Urte amaiera berezia izango da Gaztezuloko lantaldearentzat, batetik, ospakizunarekin bete-betean arituko direlako, eta bestetik, Eusko Jaurlaritzaren diru-laguntzen berri jakin zain daudelako. Nahiz eta Gipuzkoako Foru Aldundiak ipurdiko handia eman, Jaurlaritzakoak jakin arte inolako neurri edo aldaketarik ez dutela egingo esan digute Fernandez erredakzio buruak eta Perez zuzendariak.

Kirola, atal berria

Hilabetekaria argitaratzeaz arduratzen den lantaldea murritza da: Ane Irazu da gerentea, Raul Perez zuzendaria, Igone Fernandez erredakzio burua, Agurtzane Gomez publizitate arduraduna eta Inge Mendioroz diseinatzailea. Kolaboratzaile sarea ordea, ezinbesteko ardatza da aldizkarian, espezializaziora jotzen baitute ahal den neurrian.

Hala, 16 urtetik gorako gazteentzat egindako agerkaria beraien gogoko gaiak jorratzen saiatzen da. Alberto Irazu Gaztezuloko zuzendari ohiak, Udaletako Euskara-Zerbitzuen Topaketetan, udaberrian, kontatu zuen nola aldizkaria sortzerakoan gazteei beraiei galdetu zieten zer nahi zuten irakurri. Handik atera ziren “hamar mandamenduak”, alegia, sexua, literatura, zinea, Internet, teknologia berriak, telebista, albiste bitxiak, gaua, nazioartea eta umorea. Orduz geroztik aldizkariko edukiak itxuraldatu edo berregituratu dituzte, baina mamia ia ez da aldatu. Berrikuntzen artean dira, adibidez, argazkilariek ateratako argazkien txokoa eta bertso satanikoak. Urriko zenbakian berriz, gazteen azken nahiei kasu eginez, kirol atala abiatuko dute.

Igone Fernandezek adierazi digu Gaztezulo plaza bat dela, gazteek zer egiten duten jasotzeko eta gazteek beraiek egiten dutena azaltzeko. Aurpegi ezagunak asko ageri dira, baina honetan edo hartan hasiberriak direnek ere tokia dute.

Papereko Gaztezuloz aritu gara orain arte, eta nola ez, webgunea (www.gaztezulo.com) ere badute. Egunero berritzen dituzte hainbat eduki, eta azkenaldian, poliki-poliki, bideoak hasi dira zintzilikatzen. Bereziki gustura daude facebookaren martxarekin. Fernandezen ustez, “kasu askotan hain zaila den feedback hori lortzeko aukera ematen dizu, zuk sartu, beraiek erantzun... webean zailagoa da”. Kontsultak beraien indarguneetako bat dira eta Perez zuzendariak gogorarazi digu, esate baterako, sexu kontsultek harrera ona dutela, hiru urte daramatzatela kontsultekin eta aitzindariak izan zirela.
Ospakizun jaia Bilboko Kafe Antzokian
Hamargarren urteurrena ospatzeko Gaztezulok 2010eko hasieratik hainbat ekimen abian ditu. Dena dela, urria hilabete trinkoena izango da. Ondoko lerroetan duzue egitasmoen berri:

Bideo lehiaketa: Lehenengo aldiz antolatu dute, eta aldizkariak bezala, Hi eta hire munduak du leloa. Gaia oso irekia da, norberak konta dezala bere mundua. Baldintza bakarra dago, euskaraz izan daitezela lanak. Azaroaren bukaeran epaimahaiak (Jon Garaño, Jose Mari Goenaga, Koldo Almandoz, Egoitz Lasa eta Aitziber Garmendia) bideo lanen balorazioa egingo du. Sariak Euskararen Nazioarteko Egunaren inguruan banatuko dira. Sari nagusia 1.500 eurokoa izango da, eta horrez gain, Donostiako Euskararen Udal Patronatuak ikus-entzunezkoetan gastatzeko 1.000 euroko bonoa emango dio Donostian bizi den edo bertan ikasten duen gazteari. Bideoak Euskaltube edo Youtuben zintzilikatu eta lotura Gaztezulori bidali behar zaio. Gaztezulok jaso ahala zintzilikatuko ditu bere webgunean.

Festa
: Bilboko Kafe Antzokian, urriaren 15ean izango da, Esne Beltza musika taldea lagun. Sarrera doan da eta oparitxo sorpresak izango dira.

Gaztezulo Saria: Urtea bukatu aurretik, lehen aldiz emango dute sari hori. Urte hasieratik irakurleek galdera bati erantzun diote, alegia, azken hamar urteotan egindakoagatik zein euskal gazteri emango lioketen Gaztezulo Saria. Iraileko Gaztezuloren arabera Maialen Lujanbio bertsolaria doa sailkapenean aurrena eta bigarren dira Gorka Urbizu musikaria eta Koikili Lertxundi futbolaria.

Urriko zenbaki berezia: Hamaika idazlek eta hainbat ilustratzailek azken hamar urteotako atzera begirakoa egin dute. Bebe abeslaria eta Marta Etura aktorea elkarrizketatu dituzte. Argazkien txokoan, profesionalen lanak beharrean irakurleek bidalitakoak argitaratuko dituzte. Zenbaki honetan atal berria estreinatuko dute, irakurleek kirol gehiago eskatu baitute. Beraz, kirolak atal berezia izango du hemendik aurrera eta urrikoan mendi lasterketetan aritzen den Kilian Jornet katalan gaztea elkarrizketatu dute.

Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude