Ezker abertzaleak museo berriaren proiektuaren aurka gogor egingo duela adierazi du, haien aburuz “Busturialdearen etorkizuna ezin baita turismora mugatu, eta are gutxiago proposatzen duten turismo eredura, ez duelako aukera ematen biztanleen garapenerako, ez duelako bizimodu aukerarik ematen prestakuntza maila altuko gure gazteentzat, eta Urdaibaik duen berezko balioa aintzatesten ez duelako”. Busturialdearen etorkizunak “badu alternatiba bat, 1998an aurkeztua (JSEGE-PADAS), instituzioek, gizarte eragileek, sindikatuek eta enpresariek bultzatua. Eusko Jaurlaritzak onartu zuen dekretu bidez, baina gero instituzioek ez zuten inolako interesik azaldu plan horretan adostutako akordioak garatzeko. Eskualdearen garapen sozioekonomiko integrala, orekatua eta iraunkorra bideratzeko plana, hain zuzen”.

Ezker abertzaleko kargudun hautatuek eskualdeko egoera sozioekonomikoa gogora ekarri dute komunikatu luze batean: 10.000 lanpostutik gora galdu dira azken 25 urteotan arrantza, nekazaritza eta industria sektoreetan; 18-29 urteko 7.000 gaztetik gora etorkizunik gabe geratu dira lanposturik sortzen ez delako, eta biztanleria zahartzen ari da. Bien bitartean –salatzen dute– EAJk nekazaritza lurren kalifikazio aldaketa sustatu du, eta bakar batzuek espekulatzea eta etekin galantak ateratzea bideratu du, besteak beste, alderdiak berak erakunde publikoen gobernua eskuetan duela baliatuta.

JSEGE-PADAS planak aurreikusitako jardueren artean daude, besteak beste: basoen kudeaketa, Urdaibaiko natura baliabideen balioa handitzea, ur baliabideen kalitatea eta dibertsifikazioa babestea, energia iturri alternatiboak berritzea, nekazaritza inguruneko bizi kalitatea hobetzea, babes ofizialeko etxebizitzak, komunikazio azpiegiturak hobetzea, bertako nekazaritza produktuen ekoizpena eta salmenta sustatzea, arrantza sektorea indartzea, Bermeoko merkataritza portua bultzatzea, industria garapena eta enpresa jarduera sustatzea, prestakuntza jarduerak sendotzea, eta gure natura eta kultura baliabideetan oinarritutako turismoa sustatzea.
Ezker abertzaleak adierazi du gogor aurre egingo diola “Guggenheim museoak eskualdearen garapen ereduaren aurka dakarren inposizioari”. Garapen iraunkorra “elkarrizketan, herriarekiko elkartasunean, partaidetza aktiboan eta auzolanean egitea” eskatu dute, eta konpromisoa hartu dute borrokari eutsiko diotela “natura baliabideetan, Busturialdeko sektoreen arteko sinergien sustapenean, jardueren dibertsifikazioan eta gazteen gaitasunari eman behar zaion erantzunean oinarritutako garapenaren alde”.