Berriz ere EAEko aurrezki kutxen fusioari buruzko eztabaidan murgilduta gaude. BBK, Kutxa eta Caja Vitalen arteko fusioaz ari gara, Nafarroako CAN jakin baitakigu “Euskaditik kanpo” dagoela! Eta berriz ere, kutxen inguruko arazoa alderdi politikoen intereserako erabiltzen ari dira. Fusioaren lehenengo arazoa, Arabako PP proiektuaren aurka egotea izan zen, Caja Vital euren eskuetan zegoenean. Gainontzeko alderdiak, ordea, hiru aurrezki kutxen fusioaren aldekoak ziren. Gerora, Caja Vitaleko kontrola PSEren eskuetara pasa zen, bateratzearen aldekoak horiek, baina Kutxen Legea onartu arte itxaron behar zen. Bien bitartean, Ibarretxeren kontsultarekin egin dute topo. Oraingoan, lehendakariaren apustu politikoa dela medio, PSEk uko egin dio kutxen fusioari, EAJk bide “soberanista” (PSEren iritziz) uzten ez duen bitartean. Caja Vitalen arazoak direla eta, orain BBK eta Kutxaren arteko fusioaz hitz egiten ari dira, aurrezki kutxa arabarrari ateak irekita utziz betiere. PSEren mehatxua, oraingoan PPn babestua, berehalakoa izan da: Caja Vitalek EAEtik kanpo bila ditzake bazkideak!

Zein ikuskizun lotsagarria! Politikariek aurrezki kutxak txotxongiloak izango bailitzan erabiltzen dituzte. Jabeak eurak izango balira bezala! Bezeroak, kutxen benetako jabeak, baztertu egiten dira. Alderdi politiko bakoitzak aurrezki kutxen kontrola hartu nahi du, eta behin horiek bateratuta, indar ekonomiko eta finantzario handia izan dezakete. Jarrera horiekin, alderdi politikoek diru “publikoa” kontrolatu eta aprobetxatu nahi dutela baino ez dute erakusten. Eurentzat gutxienekoa da euskal gizartearen interesak defendatzea. Bestalde, “ahaztu” egiten zaie, interes politikoengatik baita ere, CAN orain gutxi arte gutxienez Hego Euskal Herriko Aurrezki-Kutxen Federazioko parte zela.