Bilbotik bueltan, San Mames Guggenheim Herriko Taberna Zazpi Kaleak zubien islada ibaian folklore guztia batera, Greziarra erdi lo zetorren autoan, neka-neka eginda. Egun gutxi batzuetako bisita zuen Euskal Herrian, eta horregatik gauza asko –lar, beharbada?– erakutsi gura nizkion denbora laburrean.
 
Autoa aparkatzen ari ginela nagiak kendu zituen, pentsakor jarri zen, galdera bota zidan halako batean, aurretik izandako elkarrizketa baten jarraipena balitz bezala:
 
– Zenbat zarete euskaldunak?
– Hiru milioi –erantzun nion.
 
Baina banekien harago joan nahi zuela:
 
– Eta horietatik zenbat dira benetako euskaldunak?
 
Eman ahalko niokeen erantzun elegantea:
– Hiru milioi.
 
Eman ahalko niokeen erantzun ortodoxoa:
– Ia hiru milioi langile.
 
Eman ahalko niokeen erantzun literala:
– Zortziehun mila.
 
Eman ahalko niokeen erantzun zahar ederra, hamasei abizen euskaldunena.
Baina Sokratiko haren aurrean ihardetsi nuen:
 
– Gero eta gutxiago dira euskalduntasunean heziak munduan.