Gizakiek sortutako makinen adimenari buruz hitz egitean, adimen artifizialaz ari gara. Litekeena da hitz horiek entzun eta zientzia fikziozko filmetako androide beldurgarriak irudikatzea. Hala ere, teknologiaren adar honek aplikazio ugari du jada. Gure artean dago eta bere presentzia handituz doa. Zientzialari gehienak bat datoz ordenagailuak geroz eta azkarragoak izango direla baieztatzean, baina batzuek gure adimen maila izatera sekula helduko ez direla dioten bitartean, apokaliptikoenak aspaldi hasi ziren gizakien eta makinen arteko borrokaz hitz egiten.

Ziurrenik 2001: Odisea espazioan filmeko HAL makina edo Harrison Ford protagonista duen Blade Runner pelikulako replicant izeneko androideen modukoak gure artean ikusi arte denbora franko pasako da, baina Stephen Hawking fisikariaren hitzak kontuan izan beharrekoak dira, etorkizun hurbilean zer topa dezakegun aurreikusten lagun diezaguketelako.

Roboten aurkako borrokak oraingoz zinema pantailetan soilik ikusiko ditugun arren, adimen artifiziala oinarri izanik eremu militarrean aurrerapauso handiak ematen ari da zenbait herrialde. Urrats horien fruituetako bat Eurofighter hegazkina da. Pilotuak zer egin nahi duen esaten dio hegazkina kontrolatzen duen ordenagailuari eta hark ematen ditu beharrezko aginduak. Armagintza industriaren helburua makina adimendunek kontrolatutako geroz eta arma indartsuagoak sortzea da eta jada Afganistan eta Irakeko herritarrek ezagutu dute modelo batzuen "eraginkortasuna". Bestalde, AEBetako armadaren menpe dagoen DARPA agentziak, neuroteknologiaz baliatuz, erdi makina erdi gizaki diren soldadu bionikoz osatutako ejertzitoa sortu nahi du 2020. urterako. Ordenagailuak pertsona baten pentsamendu eta aginduak jaso eta interpretatzea eta jarraian agindu horiek robotari helaraztea da helburua. Dagoeneko beso bionikoa garatu dute. Medikuntzaren alorrean aplikazio ugari izan dezake, hura besoa galdu duen lagun bati txertatuz gero, elbarrituaren hainbat aginduri benetakoa balitz bezala men egiteko gai litzatekeelako.

AEBetako Giza Genomaren Ikerketarako Institutuak eta Suediako Lund Unibertsitateak garatu duten txipak ere onura handiak ekarri ditzake. Biotxip hau analisi genetikoetan erabiliko da eta gai da, besteak beste, minbizi motak desberdintzeko. Halaber, oroimen galerak sortzen dituen arazoei aurre egiteko, zientzialariak laguntza bidezko ezagutza sistemak garatzen ari dira. Aparailu horiek gaixoari leku guztietara laguntzen diete eta adimen artifiziala oinarri duen softwarea, GPS teknologia, sentsore sareak eta identifikazio-plaka infragorriak dituzte. Haiei esker adinduak denbora luzeagoz egon ahal izango dira euren etxeetan, laguntza jaso beharrik gabe.

Adimen artifizialaren beste adar bat teknologia sentikorra da. Gure beharretara egokitzen diren -ez alderantziz- aparailuez ari gara. Alegia, aginduen zain egon beharrean, gure pausoak jarraitu eta une bakoitzean zer behar dugun asmatzen dute. Hainbat adituk dioenez, hiruzpalau urteren buruan era honetako tramankulu ugari izango dugu etxean. Gu bilatu eta ikusten gaituzten sentsoreez eta ematen ditugun pausoen arabera jokatuko duten makinez osatuta daude eta hauen antzeko egoerak bizitzera eramango gaituzte: gelara sartu eta argia piztuko da, mugikorrak gugandik gertu pertsona ezagun bat dagoela jakinaraziko digu, sofan esertzean telebista piztuko da, telefonoak jotzen duenean telebistaren bolumena automatikoki jaitsiko da, etxean gaudenean gugandik gertuen dagoen telefonoak joko du, ordenagailuak "pertsona berezi baten mezua" heldu zaigula jakinaraziko digu, gure agenda elektronikoa belarrira hurbiltzean telefonoaren funtzioa martxan jarriko da eta abar.

British Telecom konpainiako prospektiba arloko ikerlariek etorkizun urrunago bati begira jarri eta BT Tecnology Timeline 2006-2051 zerrenda osatu dute. Bertan, 2051. urtera bitartean ezagutuko ditugun aurrerapen teknologikoen berri eman dute, adimen artifizialaren esparruan gertatuko direnak barne. Egileek diotenez, litekeena da guztiak errealitate ez bilakatzea, baina aurrerapen teknologikoek zein nolako bilakaera izan dezaketen jakiteko eta horien inguruan hausnartzen hasteko balio dezake ikerketak. British Telecom-eko ikerlarien aurrikuspenen arabera, 2035. urterako ordenagailuak gizakiak baino adimentsuagoak izango dira, 2040an burmuin artifiziala sortuko da eta 2051tik aurrera gizakion burmuinetan gorderik dagoen informazioa -sentipenak, pentsamenduak, oroitzapenak...- ordenagailu batera transferitu ahal izango dira. Ordurako, automatikoki gidatuko diren ibilgailuak, elkarrizketak denbora errealean itzuliko dituzten sistemak, jakietan txertatutako mikrotxipak, hortzak terapia genetiko bidez birsortuko dituzten sistemak eta gure emozioak kontrolatu eta suspertuko dituzten objektu elektronikoak izango omen ditugu inguruan, besteak beste.