Arrazoi desberdinek bultzatuta, pertsona ugarik jotzen du Internetera lagun bila edo, hasierako helburua horixe ez izan arren, askok aurkitu dituzte adiskideak txat edo foro batean berriketan hastean. Gehienak ez dira "ezagun" edo "lagun" izatetik haratago joaten, baina Interneten elkar ezagutu duten bikote ugari ere badago. Agian, euskaldunok harreman birtualak oso gustuko ez ditugula pentsatuko duzue zuetako askok, eta nahiago dugula jendearekin aurrez-aurre hitz egitea. Dena den, guk ere Interneti esker geroz eta lagun gehiago egiten dugu, batez ere nerabeek, baina baita pertsona helduek ere. Hori kontuan izanik, eta "Euskal Herrian lagun berriak aurkitzeko -eta bikotea, zer esanik ez- zailtasunak bultzatuta", Alianzo enpresak gure artean bederen aitzindaria den ekimena jarri du abian: Internet eta aurrez-aurreko harremanak batzen dituen Topaleku.com proiektua.
Lagun edo bikote bila dabilenak bere izena eman dezake aipatu web gunean. Zortzi bikoteko taldea osatzen denean, partaideak Bilboko La Tramoya tabernan elkartzen dira, mahai baten inguruan eseri eta kopatxo bat hartzeko. Mahai-ingurua "animatzaile" batek gidatuko du, elkar ezagutzen ez duten lagunen arteko elkarrizketa bizirik mantentzeko. Elkarrizketak zortzi minutu irauten du, ekimenaren web gunean irakur daitekeenez, nahikoa delako denbora hori zurekin dagoen pertsonak antzeko gustuak dituen ala ez jakiteko. Ondoren, lagun horiek
www.topaleku.com atarian harreman sendoagoa izan dezakete, sarrera mugatua duen gunean.
Bidailagun bila
Kasu gehienetan, desio dugulako jotzen dugu pertsonen arteko harremanak sendotzea helburu duten web guneetara: lagun berriak nahiz bikotea topatzeko, zaletasun edo amets berberak dituzten pertsonak ezagutzeko... Gero eta gehiago dira, adibidez, bidaia zehatz bat bakarrik egitea desio ez duten eta konpainia bila Internetera jotzen duten pertsonak. Besteak beste, bidaia agentzien foroak (Eroski Bidaiak agentziarena -
www.viajeseroski.es/foros-, esaterako) dira horren isla.
Dena den, hainbatetan beharrak bultzatuta bisitatzen ditugu beste pertsona batzuekin harremanetan jartzen gaituzten web guneak. Oraintxe aipaturiko kasuetan ere baliteke "desio" hitza baino "beharra" erabiltzea egokiagoa izatea, baina...
Arrazoi horietako bat ekonomikoa da. Horren adibide dira lan kontuak direla-eta autoa partekatzera zuzendurik dauden ekimenak, Compartir.org (
www.compartir.org) izenekoa kasu. Ekimena Kataluniako hainbat udalek jarri dute abian eta proiektuarekin bat egin duten hiri gehienak hangoak dira. Dena den, Euskal Herriko bi herri, Bilbo eta Arrasate, ere batu zaizkie. Doako tresna honen helburua bidaia bera egin behar duten lagunek autoa partekatzea da. Hala, pertsona horiek dirua aurreztuko dute eta, bide batez, auto bakarra erabilita gutxiago kutsatuko dute. Orrialde honetan, normalean lan kontuekin lotura duten eguneroko bidaiei eta oporretan egin ohi ditugun bidaia luzeagoen inguruko eskaintzak aurki ditzakegu. Besteak beste, abiapuntu, helmuga, data edo bidaia estiloaren araberako bilaketa egin dezakegu.
Gainerako erabiltzaileekin harremanetan jartzeko eta interes bera daukaten lagunen arteko elkarrizketaren fidagarritasuna bermatzeko beharrezkoa da erregistratzea. Dena den, mota honetako atarietan, lehen kontaktua egitean hainbat neurri hartzea komeni da: zure helbide zehatza ez eman, beste pertsonari hainbat datu eskatu -non lan egiten duen...-, bidaia lotu baino lehen leku publiko batean hizketalditxo bat izan, gastu guztiak -gasolina, bidesariak, asegurua, aparkalekuak, matxurak, isunak...- zehaztu, irteera eta itzulera orduak eta elkartzeko lekuak aurrez adostu eta, azkenik, bakoitzaren gustu eta ohiturak -zein musika atsegin duzuen, erretzaileak zareten ala ez, eraman beharreko ekipaia...- alderatu.