Lekeitioko Zinema eta Bideo Bilerak hogeita sei urte daramatza Euskal Herrian euskaraz egiten den zine amateurra jendaurrean zabaltzen. Bertoko ekoizpenen erakusleku gisa hasi bazen ere, urteek aurrera egin ahala, bere eremua zabaldu du Bilerak. Euskara suspertzeko egindako lana eskertuko dio maiatzaren 18an Bizkaiko Ikastolen Elkarteak, Ibilaldian, Zinema eta Bideo Bilerari egingo dion omenaldiarekin.

Euskal Herrian euskaraz egindako zine amateurra erakusteko jaialdi bakarra da gaur egun Lekeitioko Zinema eta Bideo Bilerak urtero antolatutakoa. 1978ko ekainaren 9tik 11ra egin ziren jardunaldiek hasiera eman zioten urteroko hitzorduari. Euskal Zine Amateur Bilera lelopean antolatu zen lehenengo edizioa. Hogeita sei urte pasatu dira eta bere horretan jarraitzen du. Gainera, Zestoako Topaketak 1992. urtean desagertu zirenetik, Euskal Herrian egiten diren jardunaldi bakarrak dira horiek.

Benito Ansola bikarioak Lekeition abian jarri zuen zineforum saioaren ildotik etorri zen Euskal Zinema eta Bideo Bilera. Hasieran, filmeen erakuste hutsarekin konformatzen baziren ere, lehiaketa bihurtu zuten urteroko zita hura. Zinema egitearen konplexutasuna kontuan izanda eta lan profesional bakar batzuk kenduta, Euskal Herrian egiten zen zinema amateurrek egiten zuten, bitarteko urriekin, jakina.

Ikus-entzunezko garapen eta zabalkuntzari egokitu zitzaion Zinema Bilera 1986. urte aldera. Ordutik aurrera, zine ekoizpenez gain, bideo formatua ere onartu zuten lehiaketan. Hori dela eta, gaur egun aurkezten diren lan asko ez dira amateurrek egindakoak, baizik eta telebistako profesionalek ere ekoiztutakoak. Euskarazko zinemagintzaren erreferentzia bihurtu da Lekeitioko Zinema eta Bideo Bilera.

Aurtengo Ibilaldian zinemagintzan euskara bultzatu duten zenbait pertsona omenduko du BIEk. Benito Ansolak Lekeitioko Zinema eta Bideo Bilera ordezkatuko du. Zinemagintzan jardun duten Gotzon Elortzari eta Jose Julian Bakedanori egindako lana eskertuko zaie. Elortzak lehenengoz erabili zuen 16 mm-ko formatua "Ereagatik Matxitxakora" filman (1958). Bakedanok bizkaieraz grabatu zuen 1986an "Oraingoz izen gabe" filma. Antton Ezeiza, bestalde, Ikuska sailaren (1977-1985) ekoizpen lanetan aritu zen. Horrela, hogei bat laburmetraia filmatu zituen, euskal gaien inguruan («Erreferenduma» eta «Bertsolariak», besteak beste).

Juanba Berasategiren lanak ekarri zuen euskarazko marrazki bizidunen loraldia. Besteak beste, «Kukubiltxo» (1983), «Kalabaza Tripontzia» (1985), «Pernando Amezketarra» (1994-1995), «Lazkao Txiki» (1998-1999) eta «Karramarro uhartea» (1998-1999) lan arrakastatsuak ekoiztu ditu Berasategik.

Azpimarratzekoa da euskaraz filmatutako filmetan artistek egiten duten esfortzua. Lan hori omentzeko asmoz, Elene Lizarralde kazetari eta aktorea izango da Lekeition. Azkenik, zinema kritikak egiten ere aitzindaria bilakatu zen Koldo Mitxelenak aipamen berezia izango du