Hamabostean behin lasartearrek ikusi eta irakurri izan duten hamabostekariari zail egiten zitzaion gaurkotasun gaiei eustea. "Zenbait kontu edo berri denboran oso atzera gelditzen zitzaigun; leku guztietan hamaika aldiz emandako berriek 'Txintxarri'n, jada, ez zuten zentzurik. Gainera, beste urrats bat emateko garaia iritsia zela uste izan dugu" dio Ana Labaka aldizkariko zuzendariak. Hamabostekaria astekari bihurtzeak ekarri dien lan gehitzeak ez ditu larritzen arduradunak. Dagoeneko bi aldiz argia ikusi du astekariak eta harrera ona izan du kalean. Zuzendariaren hitzetan "presaka lan egin beharko dugu. Orain ostiralero ume bat izango dugu".
Zuri-beltzean, 20 orrialderekin eta 2.000 alerekin hasi zen aldizkaria aldatzen joan da. Kolore eta orrialde gehiago, Gida-Komertziala, gehigarri bereziak eta antzeko produktuak sartzen joan dira pixkanaka. Pasa den urtean aldizkariaren diseinu guztia (letra-tipoak, argazkiak...) aldatu zuten. Astekari berriak, esate baterako, 20 orrialde ditu eta kolore urdin bat tartekatuta izango du barrualdean.
Sei langilek osatzen dute lantaldea. Astekaria abian ipintzeak beste bi pertsonentzako lana sortu du; kazetari berri bat eta maketatzaile bat hartu dituzte. Gainerakoak musutruk lan egiten duten kolaboratzaileak dira. Gizarte, kultur eta kirol gaientzako sailez gain, merkatu txikia, zorion-agurren tartea eta erreportaia ditu. Astekariaren koordinatzaileak dioenez, "erreportaia eta berari lotutako kale-inkestak izaten du arrakastarik handiena, kaleko jendearen aurpegiak eta iritziak ateratzen baitira". Ia 5.000 ale banatzen dituzte Lasarte-Orian bertan eta inguruko herrietan. Kanpoan bizi diren lasartearrek ere herriko kontuak gertutik jasotzeko aukera izaten dute. Doako harpidetzaren bitartez eta tabernetan, ikastetxeetan utziz egiten da aldizkariaren banaketa.
Gazteak dira aldizkariaren irakurle nagusiak. Lasarte-Oriako Udaleko Euskara Batzordeak Ttakun euskara elkartearekin batera aldizkariaren ezagutzari buruzko azterketa bat egin zuen orain dela lau urte lasartearren artean. Ikerketa horren arabera, irakurleen erdia 14 eta 30 urte bitarteko gazteak dira. "Herriko ikastetxeekin harremanetan egoten gara. Ikasleek egindako lanen berri ematen digute eta beraien argazkiak argitaratzen ditugu".
Erakunde publikoek (Udala, Eusko Jaurlaritza eta Gipuzkoako Foru Aldundia) emandako diru laguntzekin eta publizitatetik ateratzen dutenarekin ordaintzen dute aldizkaria, herri komunikabide gehienen antzera. Astekariaren ideia sortu zenean Udalarekin jarri ziren harremanetan finantziazio aldetik bideragarria izango zen jakiteko. Hainbat bileraren ostean Udalaren diru laguntza jaso du aldizkariak.
Orain zazpi urte hasi ziren aldizkaria sortzearen inguruko bilerak eta azterketak. Erdaldunen kopuru dezentea duen herri batean, Lasarte-Oriaren gisako herri industrializatu batean alegia, euskara hutseko aldizkaria bideragarria izan zitekeen aztertzen hasi ziren. Hizkuntz normalizazioa lortzea zen helburu nagusia. Hasieran zalantzak ugariak izan baziren ere, ateak zabaldu zizkioten proiektuari. 1993. urteko urriaren 1ean argitaratu zen lehenengo alea eta geroztik ibilbide luzea eta oparoa izan du urte hauetan zehar.
Udalak eta Ttakunek emandako datuek adierazten dutenez, lasartearren %80ak (12.800 herritar) ezagutzen du aldizkaria. Kontuan izan behar da Lasarte-Oriako euskaldun osoen kopurua biztanleriaren heren bat besterik ez dela. Eustatek 1996an ateratako datuen arabera, euskaldun osoak 6.259 dira; ia euskaldunak 3.002 eta erdaldunak 8.320.
Euskararen inguruan azken urteotan herrian egiten diren ekintzak ere ugariak dira. Bai Udaleko Euskara Zerbitzutik eta baita Ttakun euskara elkartetik ere jarduera ezberdinak antolatzen dira urtean zehar. Urrats batzuk eman dira dagoeneko: bertso-eskola, haurrentzako euskarazko udalekuak... Azkenengoa Jalgi Kafe Antzokia martxan ipintzea izan da. Hiru urtetik hona ateak zabalik ditu, eta bertan kultur ekitaldiak, erakusketak eta kantaldiak egiten dira. Labakak dioenez "jende asko biltzen du". Etorkizuneko proiektuei begira, ideia asko dituzte buruan, baina momentuz astekaria finkatu, orrialde-kopurua gehitu eta produktu osagarriekin jarraitzeko asmoa dute.