Ekainaren 22tik 25era IV. Ondarroako Itsasoko Feria izango da, Lea Artibaiko Mankomunitateak Ondarroako Udalaren laguntzaz antolaturik. Beraz, egun horietan itsasoko sektore laguntzailearen erakusleiho teknologiko eta Euskal Herrian hain garrantzitsua den sektore honek dituen erronka nagusiei buruzko eztabaida gune bihurtuko da Ondarroa. Feria hau, aurreko hiru urtetan lortutako emaitzei esker, sektoreko garrantzitsuenetakoa bihurtu da, bai Euskal Herriarentzat eta bai Kantauri osoko sektorearentzat. Ondarroa Euskal Herriko portu nagusia da harrapaketari dagokionez (guztiaren %47,14), eta bere negozio kopurua urtean 8.500 milioi pezetakoa da (%48,35). Orobat, Kantauri osoko emaitzarik onenak lortzen ditu sektorean.
Aldi berean, feria, sektoreko profesionalentzat izateaz gainera, Euskal Herriko bazter guztietatik etor daitezkeen bisitariek Ondarroa eta Mankomunitatea ezagutzeko aukera izatea ere nahiko lukete antolatzaileek. Horregatik, agenda profesionalarekin batera, bestelako ekintza batzuk ere antolatu dituzte: itsas salbamenduko ariketak, arrain mota ugariren dastaketa, itsaspeko arrantza lehiaketa eta abar.
Hirurogeita hamar erakustoki inguru izango dela uste da; Euskal Herrikoak, Espainiako Estatuko hainbat lekutakoak eta mundu osokoak. Urtetik urtera ugaritzen ari diren sektoreko profesional horiek guztiek 1.600 metro koadro inguruko karpa bat erabiliko dute.
Feria hau joan den urtean guztiz finkaturik geratu bazen ere, aurten, sektoreak bizi duen egoeraren ondorioz, garrantzia berezia bereganatuko du. Izan ere, une honetan euskal flota 44 ontzi berri eraikitzeko prozedura berritzaile batean murgildurik dago, 10.000 milioi pezeta (400 milioi libera) inguruko inbertsioekin, eta, gainera, beste 104 espediente abian jarriak dira ontziak modernizatzeko.
Itsasoko Feria honetako azken ekitaldietan zehar Kantauri osoko armadore eta profesionalekin izandako harreman komertzial geroz eta ugariagoetan nabarmentzen denez, geroz eta garrantzi handiagoa ematen diete honelako feria lokalei, eta, behatzaileek diotenez, sektoreko feria handien garrantzia eta merkatu kuotak bereganatzen ari dira. Duela gutxi horrelako beste feria bat ere izan da, arrakasta osoz, Bermeoko portuan. Nonbait, bezeroarekiko hurbiltasuna eta haien premiei hobeto egokitzen zaizkien produktuak eta zerbitzuak eskaintzea da honelako feriek duten arrakastaren gakoa.
Ondarroako Feria, gainera, benetako eztabaida gune bihurtzen da, sektoreko gaiak eta sektorearen etorkizuna aztertzeko. Antolatzaileek hainbat eztabaida saio aurreikusi dituzte sektoreko partaide nagusien artean: Armadoreak, Nagusiak, Makinistak, Marinelak eta Administrazioa. Itsasoan eta arrantza arloan dauden arazo eta erronka nagusiak izango dituzte eztabaidagai. Besteak beste, flota berritzeko Eusko Jaurlaritzaren jardunbidea, arrantzako titulatu nautikoen egoera, kala berriak edo geroz eta marinel urritasun handiagoa

Urte honen amaierarako, Europako Batasunaren erabakiz, arrainak kalitatearen eta informazioaren etiketa eraman beharko du derrigorrez. Alabaina, arrainaren kalitatea eta jatorria kontrolatzeko parametro batzuk lortu nahi dira. Pasaia, Hondarribia eta Ondarroako portuetan, neurri berrira ohitzeko asmoz, esperientzia eredu batzuk jarri dituzte martxan hilabete honetan. Arraina portuan bertan etiketatuko da saldu aurretik, eta gerora beste portuetara zabalduko da.
Arrantzaleak, hasiera batean, ez zeuden oso ados etiketarekin. "Errege Dekretuak pentsaera bat inposatzen zuen, baina ezin izan da bestelako irtenbiderik aurkitu, eta erabiltzen hasiko gara", adierazi zuen Ondarroako Arrantzaleen Kofradiako kide Victor Badiolak. Bere ustez, zailena arraina portuan bertan etiketatzea da.
Derrigorrezko etiketatzeak ez du inolako kalitate mugarik, informazioa ematea beste baldintzarik ez du. Une honetan bada taula bat, arrainaren kalitatea mailakatzeko; horren arabera, arraina "Aparta", "Goi Maila" edo "Erdi Maila"-koa da.
Joan den maiatzaren 19an, Europako Batasuneko itsasertzeko herrialde guztietatik etorritako ordezkariak bildu ziren Bilbon. Arrainaren kalitateari buruzko etiketaren ezaugarriak zeintzuk izan behar duten eta nola kontrola daitezkeen eztabaidatzea zen helburua. Etiketa hori norberaren borondatearen araberako izatea nahiko lukete. Etorkizunean ezarriko den borondatezko etiketa horren bidez, produktua nabarmentzeko aukera izango dute armadoreek edo merkaturatze enpresek. Etiketan jatorria, hustu zeneko portua eta tamaina adieraziko dira, eta, kalitatea aipatzeaz gainera, arrantzarako erabilitako tresna edo aparailua ere zehaztuko da, eta hori oso garrantzitsua da Arrantza eta Elikaduraren Institutu Teknologikoaren (AZTI) eta arrantzaleen iritziz. Esate baterako, Europako Batasuneko arautegiek bolanten desagerpena ezarri dute, eta etiketari esker iruzurra baztertu ahal izango da.
Herrialdeetako kultura eta ohituren ezberdintasuna kontuan izanik, ez da erraza izango Europako portu guztien artean irizpideak bateratzea. Horren ondorioz, etiketa eredu bat edo bi egitea erabaki daiteke. Euskal Herrian etiketaren kultura ez da berria. Dagoeneko badira hiru urte bestelako borondatezko etiketa erabiltzen dela, eta euskal kontsumitzaileak ikusia du hegaluzeak eta hegalaburrak isatsean daramaten etiketa, merkatuko kalitaterik handieneko arrain gisa bereiziz. Hain zuzen ere, Euskal Kalitatearen "K" kalitate markari dagokiona da