Gaiak kezka sortzen du jendearengan, eta horrexegatik azken datuak emango ditugu lan honetan. Osasun eta Kontsumoko Ministerioak badu erakunde bat, Kalitatearen Ikerketa eta Kontroleko Zentroa (CICC), janari-produktuak eta baita industrialak ere aztertzera jarria dagoena. Ministerioak bere azken txostenean azpimarratzen duenez, CICC erakundeak aztertutako produktuetatik erdiak baino gehiagok gainditu zuten kalitate-kontrola, eta txostenean agertzen denez, janariek kalitate hobea dute produktu industrialek baino. 1998an ia 7.000 lagin aztertu ziren CICCko laborategietan, janariak eta produktu industrialak batuta: 3.890 lagin janari-produktuenak izan ziren (guztizkoaren %55,9) eta gainerako 3.069 laginak produktu industrialak (guztizkoaren % 44,1). Aztertutako laginen %51,1ek ez zuten inolako irregularitaterik, eta kontsumorako egokitzat jo ziren. Aitzitik, laginen % 44,3an akatsak aurkitu ziren, etiketatuaren inguruan batik bat; gainerakoetan (% 4,6an) ez zen behin betiko irizpenik eman edo lagina baliogabetzat jo zen. Datuek ia bi puntu eta erdiko hobekuntza erakusten digute 1997arekiko, lagin erabat zuzentzat % 48,7a hartu baitzuten. Lasaitasuna ematen duten datuen ondoan, etengabe agertzen dira dioxinarena bezalakoak, eta orduan ez dakigu zer egin: datu ofizialekin konformatu, edo protesta egin, hainbeste eskandaloren aurrean