2005eko abuztuaren 5ean okupatu zuten Zizurko gazteek Spar supermerkatu zaharra. Iruñeko Euskal Jai gaztetxe ezaguna eraitsi ostean, inguruko auzo askotan errepresio gogorra jasan zuten gaztetxeek. Esparruk, ordea, aurrera jarraitu zuen, hainbat urtez Iruñerriko gaztetxe bakarrenetakoa izanez.

“Geldiezinak” lemapean antolatu dute hamargarren ospakizun festa. “Geldiezina: ezin geldi daitekeena. Geldirik egoten ez dena. Hau da Esparru gaztetxea”, adierazi dute sare sozialetan. Kontzertuak, afariak, pintxopotea nahiz brindisak, ekitaldi ugari izanen dira gaztetxe inguruan ostegunetik aurrera.

Egun potoloa, ordea, larunbatean antolatu dute. Goizetik hasita txupinazoa, gazte olinpiadak, bazkaria, manifestazioa eta kontzertuak izanen dituzte Zizurren: Elsa Bhör, Bide Bakarra, El Sonido de la Metralla eta Las Tea Party DJs egonen dira zuzenean, eta kartelean adierazi dutenez, festa goizalderarte luzatuko da.