Bizkaiko Ongi Etorri Errefuxiatuak taldeak prentsa eta hedabideen euskal elkarte profesionalei zuzendutako mezuan, salatu du Euskal Herrira etorritako migratzaile eta errefuxiatuen egoeraz informatzeko orduan “ikuspegi sentsazionalista, bai eta hedabide batzuek aipatu etorkinen eskubideak urratu dituztela ere”.

Ekintzaileen arabera “kazetaritzako jardunbide batzuek sistematikoki urratzen dute migratzaile eta errefuxiatuen intimitate eta norberaren irudirako eskubidea; adibidez, argitaratzen dituzten argazkietan polizien aurpegiak pixelatuta erakusten dituztenean, baina inolako babesik gabeko pertsona haienak agerian; ezagutuko balituzte, kalteak jasan litzakete”.

Gaineratu dute trataera “informatibo polizial eta alarmista ematen jarraitzeak, non segurtasunari baino ez zaion ematen garrantzia, segurtasun eta konfiantzarik eza” besterik ez duela eragiten, eta xenofobia, gorrotoa eta indarkeria sustatzen duela.