Lurralde Antolamenduaren Legea moldatu nahi dute EAJk eta PSEk, “Interes Publiko Goreneko” proiektuen inguruko erabakiak udalei kendu eta Jaurlaritzari emanez. Moldaketaren aurka mobilizatzera deitu du Araba Bizirik plataformak, abenduaren 2an.
Helburu bakarra du Arantza Tapiak publikoki defendatu duen moldaketak, Araba Bizirik plataformaren esanetan: “Udalek baztertu ahal izan dituzten azpiegituren plangintzen onespena Eusko Jaurlaritzaren esku bakarrik uztea”. Araba Bizirik plataforman AHTaren eta parke fotovoltaiko zein eoliko handien aurkako mugimenduak batu dira, besteak beste, eta lege moldaketak zuzenean eragiten diela salatu du: “Gasteizek berriro ere frackingaren mehatxua du ate aurrean; kontzejuek, instalazio zentral eoliko edo fotovoltaikoek dakarten lur komunalen desjabetzeari edo AHTaren trazadurari aurre egin diotenek, berriro ere mehatxu bera dute aurrez aurre”. Mehatxua Arabatik harago doala azpimarratu du plataformak, halere: “Gipuzkoan eta Bizkaian erraustegiak jartzeko proiektuak edo goi-tentsioko sareen trazadura Eusko Jaurlaritzak dituen lehentasunen adibide garbiak dira”.
Gorka Urtaran, Gasteizko alkatea eta Eudeleko presidentea
Iragan ostiralean, Gasteizko Udaletxeko osoko bilkuran, legea izan zen eztabaidagai, eta EH Bildu, Elkarrekin eta PP alderdiek bat egin zuten moldaketaren aurkako mozio batean. Mozioa onartu egin zen hiru alderdien baturak gehiengoa osatzen duelako, baina EAJk eta PSEk aurka bozkatu zuten. Gasteizko alkate eta Eudeleko presidente Gorka Urtaranen jarrera kritikatu du Araba Bizirik plataformak: “Gorka Urtaranek argi eta garbi utzi du bere jarrera; Gasteizko Alkatetzaren lehendakaritzan aritu ordez, EAJren aginduak aintzat hartu besterik ez baitu egiten”. 2020ko abenduan Gasteizko Armentia-2 putzuan gasa dagoen ikertzeko baimena ukatu zion Jaurlaritzari Gasteizko Udalak. Arantza Tapiak erabakia kritikatu zuen eta berak gidatzen duen sailak helegitea aurkeztu zuen udalaren erabakiaren aurka. Urtaranek udalaren erabakia defendatuko zuela adierazi zuen.
Mobilizazioa ostegunean
Lege moldaketa gelditzea eta “bere garaian aho batez onartutako Lurraldearen Antolamendurako Legean lortutako adostasuna errespeta dadila” eskatu du Araba Bizirikek. Helburu horrekin deitu ditu Arabako, Gipuzkoako eta Bizkaiko herritarrak mobilizatzera, abenduaren 2an, goizeko 11:00etan, Gasteizko Legebiltzarraren aurrean, “Tapia legeari ez!” lelopean.
Etiopia, Somalia eta Kenyako hainbat eskualdetan ia hiru urtez euririk gabe egon ondoren, azkenaldian urpetuak izan dira. Sasoi kontrasteak ohikoak izanik ere eskualde hartan, klima aldaketarekin larritzen dira, eta euriak hobeki baliatzeko hainbat tokiko ekimen garatzen ari... [+]
Urola ibaiaren meandroan, Zestoako Iraeta auzoan daude Amilibia baserria eta bere lur emankorrak: 5 hektarea baso eta 4 hektarea laborantza lur. Laborantza ekologikoa sustatzen duen Biolur elkarteak baserria eta lurra kolektibizatu nahi ditu Amillubi proiektuaren bidez... [+]
Ez dakit zure herrira helduko den Hamaika diziplina anitzeko proiektu artistikoaren erakusketa.
Artelanekin batera, hamaika lekukotasun. Bertan denetarik dago: beldurra, mina, amorrua, esperantza, etsipena, indarra... Maitasunez idatzitako testigantzak. Garondoan mehatxuaren... [+]
Teofanes Aitorlea kronikalariak jaso zuenez, 763-764ko negua inoizko hotzenetakoa izan zen Konstantinoplan. Elurrak eta izotza hartu omen zuten bizantziar hiriburua eta Bosforon iceberg bat ere ikusi omen zuten.
Orain arte klima hoztea, besteak beste, jarduera... [+]
Hauteskunde-kanpainen arteko tarte gero eta estuagoan, komeni da XXI. mendeko urte erabakigarrietan sartu garela gogoraraztea. Adibide bakarra jartzearren, ozeanoen tenperatura-errekorrak etengabe gainditzeak izututa dauzka zientzialariak, eta dagoeneko ez dakite egoeraren... [+]