Erabakia hartu dute berretsi dutenean yihadistek eraman dituztela Turkiarekiko mugan dagoen Bab al-Hawa herriko biltegietako materialak. Mendebaldeko aliatuek sostengatzen duten Siria Askearen Fronteak biltegi horietan zeuzkan pilaturik amerikar eta ingelesek oparitutako gaiak eta joan den asteburuan Fronte Islamiarreko ekintzaileek basearen kontrola harturik material guztiok hartu zituzten berentzako. Siria Askearen Fronteak lotura handia duen bezala Mendebaldeko potentziekin eta Golkoko erregetza batzuekin, Fronte Islamiarra Saudi Arabiak elikatzen du nagusiki eta Afganistango gerraz geroztik mundu musulman osoan zabalduz joan diren mugimendu yihadisten kide da.

Yihadistek harrapatutakoez gauza ezberdinak esan dira egunotan. Mendebaldeko iritzi publikoa lasaitzearren edo, hasieran esan da logistikako gaiak eraman dituztela: janaria, janzkiak, kamioiak, komunikazioko tresneria… Baina geroago arduradunak hasi dira aitortzen hegazkinen eta tankeen kontrako armak ere badirela ebatsien artean, The Guardianek zehaztu duenez: "Freonte Islamiarrak, zeina sei brigada errebeldek osatzen duten, atzeman ditu hegazkinen kontrako armak eta tankeen kontrako suziriak zeuzkan biltokiak Bab al-Hawako bidegurutzean, Turkiako mugan, joan den astean. Taldea Saudi Arabiak babesten du".

Itxura batera, Mendebaldeko potentziak eta oro har urtarrilean Siriako gaztazkaz bildu behar duten guztiak kezkatuta daude hasieran Baxar al Assaden errejimenaren eta oposizio osoaren arteko gatazka bilakatu delako denek denen kontrako gerra txiki multzoa. Ondoko egunek erakutsiko dute mugimenduok zerikusirik baduten Iranekiko krisia baretzearekin eta Barack Obamak Mendebalde Hurbilean ezarri nahi duela dirudien politika berriarekin.