2020ko udaran okupatu zuten hainbat gaztek Portugaleteko Nuestra Señora del Carmen kristau eskola, hainbat urtez abandonaturik egon ostean. Portugaleteko gaztetxe bilakatu zuten, eta “kapitalismoaren logikatik kanpo” alternatiba politiko nahiz kulturala eskaintzeari ekin zioten, Portugaleteko herriari “espazio kolektibo” bat eskainiz. Orain eraikinaren jabeak okupazio delitu arin bat dela-eta bederatzi gazteren aurkako salaketa jarri du, eta astearte honetan egin da lehenengo auzia Barakaldoko epaitegian.

Naiz-ek jaso duenez, lau akusatuen defentsak egozten zaien okupazio delitu arinaren preskripzioa planteatu du, eraikina okupatu zenetik lau urte baino gehiago igaro direlako. Fiskaltzak hori onartu eta karguak erretiratu ditu, eta beraz, ahozko epaiketa eten du. Auzia artxibatuko duen ala ez argitzeko autoa emango du, seguruenik, bi edo hiru asteko epean.

Fiskaltzak auzia artxibatuko ez balu lau edo bost hilabete barru egingo litzateke berriz epaiketa. Kontrara, akusatuen defentsak Tele7 katean azaldu bezala, kasua artxibatzekotan beste bi aukera izango lituzke eraikinaren jabeak; batetik, beste pertsona batzuen aurkako zigor prozedura irekitzea, eta bestetik, jabetza berreskuratzeko prozesu zibil bati ekitea.

Sastrakako kideek adierazi dutenez, bederatzi gazteei baino “mundu ikuskera eta borroka kolektibo bati” egiten zaion epaiketa da, okupazioaren mugimendua “kriminalizatu eta zigortu” nahi dutelakoan. Epaitegiaren aurrean bederatzi gazteei elkartasuna adierazi diete eta jardunarekin jarraituko dutela berretsi dute.