Ingelesa bultzatzeko aitzakian, eskuin foralak bultzaturiko programak D ereduaren hedatzea oztopatzea helburu zuela iritzi dio hainbatek. Ikasgaiak ingelesez erakustea du oinarri eta funts pedagogikorik ez duela eta hutsune asko dituela salatu izan dute hezkuntza eragileek, baita irakasleek ingelesez bestelako ikasgaiak emateko prestakuntza falta nabaria dutela ere. Zuzendari, guraso, sindikatu eta irakasleak ikusi ditugu programa salatzen.

Aurreko legegintzaldian, “PAI programaren inposizioa” bukatzen zela eta berau eskaintzen jarraitu ala ez ikastetxe bakoitzaren erabakia izango zela iragarri zuen Jose Luis Mendoza Nafarroako Hezkuntza kontseilariak.

Orain, Castejongo ikastetxeak programatik ateratzeko hautua egin duelarik, oso haserre agertu da Navarra Suma. Gurasoak aintzat hartu gabe ikastetxeak unilateralki harturiko erabakia izan dela dio alderdi politikoak. “Legeak ahalbidetzen duelako gertatu da hau, politika sektario bati eta PAIren kontrako jazarpen politika bati erantzuten dion legea, aurreko legegintzaldian euskal nazionalismoak inposatua”.