Homofobiari, arrazakeriari eta matxismoari aurre egiten ari dira gure gizarteak, pixkanaka bada ere. Adinkeriaren ondorioz herritarren zati handi batek jasaten duen diskriminazioa, ordea, oraindik ez da plaza publikoko eztabaidagaia. Hori aldatu nahi du “Old lives matter” kanpainak.

Ekimena Frantziako Estatuko Geriatria eta Gerontologia Elkartetik abiatu da eta mundu osoa jasaten ari den COVID-19 pandemia du testuinguru, izan ere, koronabirusaren hedapenak are nabarmenago utzi du adinekoen diskriminazioena. "Hedatuena, arruntena eta unibertsalena” den diskriminazioa, ekimenaren bultzatzaileen esanetan. Gainera, legez zigortuta ez dagoen bakarra da.

Mundu osoko 40 erakundek baino gehiagok gogorarazi dutenez, COVID-19aren pandemian 65 urtetik gorako pertsonek ordaindu dute preziorik altuena. Horregatik, eta Europar Batasuneko Oinarrizko Eskubideen Gutunaren 25. artikuluaren 20. urteurrenarekin bat eginez (“adinekoek bizitza duin eta independentea izateko eta bizitza sozial eta kulturalean parte hartzeko duten eskubidea" azpimarratzen du artikulu horrek), ekimen honen bitartez gizartea ispiluaren aurrean jarri nahi dute.

Erakunde zientifikoek adierazi dutenez, "gure gizarteak ahultzen dituen diskriminazio maltzurra da” adinkeria. Beraien esanetan, “heldu gehienak gizartean aktiboki parte hartzetik baztertzea tragedia onartezina eta giza duintasunaren aurkakoa da".