Rabe irratian Free Nekane plataformako Anouk Maria Robinigg kideak mezu hau zabaldu du: Suitza azkenean posizionatu egin beharko dela, alegia, erabaki egin beharko duela torturaren aurkako ituna urratuko duen edo aitzitik itun hori beteko duen, Espainiak torturatu egiten duela agerian utziz.

Azaroaren 18an Bernan egindako elkarretaratzea

Eguerdiko 12:00etan 50 lagun inguru elkartu ziren Bernako Justizia egoitzaren aurrean. Anarchistisch-ek sare sozialetan zabaldutako argazkiak:

 

 

 

 

 

 

 

 

 

 

 

 

 

 

 

 

 

Barrikade.info webguneak egin du elkarretaratze horren kronika.

Azaroaren 20an elkarretaratzea Asteasun

Nekane Txapartegiren jaioterrian arratsaldeko 19:00etan dago deituta elkarretaratzea.

Hemen maiatza bukaeran Hala Bedi irratian Txapartegiri egindako elkarrizketa entzungai. Maiatzaren 22an deitu zuten Txapartegi deklaratzera bideokonferentziaz, baina ez zuen adierazpenik egin, Espainia eta Suitzako estatuen jokoan ez sartzeko. Argazkian, egun horretan Asteasun egin zen elkarretaratzea:

2016an Espainiak egindako extradizio eskaera ez zen burutu

2016an Suitzako Gobernuak Txapartegi kartzelan izan zuen 17 hilabetez, Espainiaren extradizio eskaera zela-eta. Baina Txapartegi 2006an 18/98 makrosumarioaren barruan Espainiako Auzitegi Nagusiak epaitu zuenean bere aurkako froga bakarrak torturapean egindako autoinkulpazioak izaki, Suitzako iritzi publikoan extradizioaren aurkako jarrera gailendu zen, Free Nekane mugimenduak gaiari buruz informatzeko eta atxikimenduak lortzeko egindako lanaren ondorioz.

Suitzako gizarteak Txapartegiren kasua zuzenean torturarekin lotzen zuenez, Suitzako Gobernuak estu ikusi zuen bere burua euskal errefuxiatu politikoa extraditatzeko, eta Txapartegik ARGIAren 2627 astekarian kontatu zuenez, irtenbide bat bilatu zuten Espainiako Gobernuaren eta Suitzakoaren artean: Espainiako Auzitegi Gorenak Txapartegiren kondena erdira murriztu zuen eta beraz, kartzelaldia dagoeneko beteta atera zen Suitzako kartzelatik.