Bilboko Irala auzoa #BotaKuartela Asanbladak egindako performanceren eszenatoki bilakatu da abenduaren 28an, Inuzente-egunarekin bat eginez. Bilboko Gobernu Militarraren koarteleko militarrek “utzi” egin dute beren postua, eta botak burdin hesian zintzilikatu, erretiratzen direla iradokiz. Aldi berean, bi pertsona ateetan kateatu dira eta koartela auzotarren erabilerarako gune bilaka dadin galdegin dute.

Ekimenak ustekabean harrapatu ditu bizilagunak, eta uniformedunak desfilatzen ikusi dituzte, solemnitatez, herritarrei lekua utziz. Ironia eta salaketa ere uztartu dituen ekintzak eta Severino Ala Guerra izena eman dioten ofizialaren adierazpenak ere bildu ditu: "Botak zintzilikatu eta auzoari erabakitzen uzteko garaia da", esan du ofizialak.

Asanbladaren arabera, parodiaren helburua da benetako arazoei aurre egingo dieten proiektuen beharra ikusaraztea, “hala nola desberdintasunari, pobreziari edo osasun eta hezkuntza faltari”. Hurrengo asteartean, hilak 13, espazioaren etorkizuna erabakitzeko erreferenduma egingo dute, eta hainbat proposamen egingo dituzte.

Handik minutu gutxira, 11:15ean, Ertzaintzaren hainbat unitate bertaratu dira, eta manifestariak identifikatu dituzte.