"Arrazoi politikoengatik" utzi du Bañosek Kataluniako legebiltzarreko eserlekua, ez delako gai sentitzen "gehiengoak hartu duen jarrera defendatzeko". Bañosek berak idatzitako gutun batean azaldu du bera Junts Pel Sí koalizioak egindako proposamena onartzearen aldekoa zela, La Vanguardian irakurtzen denez.

Irailaren 27ko hauteskundeen ondoren, iazko azaroan, honakoa adierazi zion Bañosek ARGIAri Artur Masen inbestidurari buruz: "Guk beti esan dugu Mas presidente gisa, hau da, kontseilariak izendatzen dituen Gobernuko agintari nagusi gisa bozkatzearen, eta apokalipsi itxura duten hauteskunde aurreratuen eszenatokiaren artean, aukerak daudela, aukera hobeak, independentismoa indartzen dutenak".

Ondorengo hilabeteetan CUPen eta Junts Pel Síren arteko elkar ulertzeko zailtasunek bestelako aukerentzat zirrikitu geroz eta estuagoa utzi dute.

CUPek kanpainan hartutako konpromisoa

Hauteskunde kanpainan hartu zuen Mas ez inbestitzeko konpromisoa, eta hiru hilabete geroago berretsi egin du. Guztira 67 pertsonak eman dute bozka, eta emaitza estua izan da: 36k egin dute Mas inbestitzearen kontra, 30ek alde, eta bat abstenitu egin da.  CUPek adierazi duenez, 10 diputatuen abstentzioa da Sabadelleko Asanblada Nazionaleko berdinketa islatzeko modurik aproposena.

Erabaki horren ostean bi aukera zabaldu dira: Junts Pel Sík hautagai berria aurkeztea, edo hauteskundeak martxoan errepikatzea. CUPeko diputatu Gabriela Serrak “orain arte mugitu ez duen fitxa mugitzera” deitu du Junts Pel Sí. Sergi Saladie diputatuak gaineratu du balizko hautagai alternatiboei ez dizkietela ateak itxiko. “Oraindik astebete dago proposamen berriak egiteko. Gehiengo independentista dugu prozesua aurrera eramateko, baina hautagaitzaren inguruan oraindik ez da kontsentsurik erdietsi”.

Gauzak horrela, baloia orain Junts Pel Síren teilatuan da. Hautagai berri bat aurkeztekotan, urtarrilaren 9ra arte izango luke epea, 10ean legebiltzarra automatikoki desegingo baita presidenterik izan ezean. Koalizioak orain arte irmo eutsi dio Masen hautagaitzari, eta behin baino gehiagotan esan du ez dela beste aukerarik. Hortaz, jarrera horri eutsiz gero, hauteskundeak egin beharko dira berriro. “Hauteskundeak errepikatu behar izatea gaur gaurkoz karta eskuetan duenaren immobilismoaren ondorio izango litzateke”, azaldu du Serrak.

CUPen aurka egin dute Forcadellek eta Sanchezek

Erabakia jakin eta gutxira Kataluniako parlamentuko presidente Carme Forcadellek adierazi du uste zuela CUPek irailaren 27ko "mandatu demokratikoa” errealitate egiten lagunduko zuela, baina “oso oker” zebilela.

Ildo beretik mintzatu da Jordi Sanchez, Kataluniako Asanblada Nazionaleko (ANC) presidentea: “Barkamena eskatu nahi diogu ANCk edozein aukera independentistari bozkaztea eskatu zuenean gutaz fidatu zen orori”.