Bilboko Arriaga Antzokian egin dute aurkezpena AEK-ko kideek. Lasterketako arduradun berriak, Asier Amondok, ahaleginak batzeko eta auzolana indartzeko beharra azpimarratu du. “Euskal Herria euskalduntzeko norberaren eta taldearen ahalmenean sinetsi eta erabil dezagun ahalmen hori”, horra euskalduntze koordinadorak datorren Korrikan zabaldu nahi duen mezu nagusia.

Euskal Herri osoko 100 inguru euskaltegi eta gau eskoletan lanean diharduela gogorarazi du AEK-k. Denetan ere diru kontuak dira buruhauste nagusietakoa, Mertxe Mujika erakundeko koordinatzaile nagusiak esan duenez.

Ipar Euskal Herrian eta Nafarroan, diru laguntza publikoen iturria itxita dago AEKrentzat. EAEn, berriz, krisi ekonomikoaren aitzakiarekin laguntza politika okertu da, Mujikaren berbetan. Hortaz, hemeretzigarren Korrikan jasotako sosak euskaltegi eta gau eskolei laguntzeko erabiliko dituzte.

Ohi denez, Korrikari lotutako ehunka ekitaldi izango direla iragarri, eta aurtengo omendua nor izango den jakinarazi dute: 2015ean 50 urte beteko dituen Durangoko Azoka. Elkarlanaren balioa azpimarratu gura duten honetan, elkarlan horren fruiturik azpimarragarrienetako bat Gerediagak antolatzen duen ekimena dela nabarmendu dute. Durangokoa, azoka ez ezik, “euskalgintzaren eta euskal kulturaren bilgunea da, euskaldunen eta kulturzaleen ezinbesteko topalekua”.