Hipoteken zergak herritarrek pagatu beharko dituzte: zer eragin du erabakiak Hego Euskal Herrian?

  • Espainiako Auzitegi Gorenak epai polemikoa eman du hipoteken zergen inguruan: hasieran zera hori bankuek ordaindu behar zutela ebatzi ondoren, atzera egin du eta astearte honetan erabaki du herritarrek ordaindu beharko dutela. Nola eragingo du neurriak Hego Euskal Herrian?

ARGIA @argia
2018ko azaroaren 07a
Espainiako Auzitegi Gorenaren erabaki berriak polemika eragin du.

Araban, Bizkaian, Gipuzkoan eta Nafarroan eragina izango du Espainiako Auzitegi Gorenak astearte honetan egindako ebazpenak, baina efektua mugatuagoa izango da Espainiarekin konparatuz gero. Hasteko, Arabako, Bizkaiko eta Gipuzkoako herritarrek ez dute Egintza Juridiko Dokumentatuen (EJD) gaineko zergarik ordaintzen erositakoa haien ohiko etxebizitza bada.

Beraz, Euskal Autonomia Erkidegoan bigarren etxebizitzak erosten dituzten herritarrak izango dira hipotekaren zerga beren gain hartu beharko dutenak. Sinatutako maileguaren %0,5ekoa izango litzateke kasu horretan erosleak ordaindu beharko lukeen zerga.

Nafarroako kasuan ez dago EAEkoa bezalako salbuespenik eta ohiko etxebizitza erosteko hipoteketan ere %0,5ekoa da zerga. Hori bai, Babes Ofizialeko Etxebizitzen kasuan zerga hori ez da aplikatzen.

Bankuak irabazle, herritarrak galtzaile

Hego Euskal Herrian izango duen eragina gorabehera, Espainiako Estatuan hautsak harrotu ditu Auzitegi Gorenaren epaiak. Urriaren 18an publiko egin zuten epaiarekin alderatuta 180 graduko biraketa egin dute epaileek hiru asteko tartean: hasieran adierazi zuten bankuek ordaindu behar zutela hipoteken zerga baina hurrengo egunerako epaia errebisatuko zutela iragarri zuen Luis Diez-Picazok, Auzitegi Goreneko hirugarren aretoko presidenteak.

Epai berria ere epaileen arteko debate luzearen ondoren etorri da: 28 epailetatik 15ek babestu dute zerga herritarrei egoztea eta 13 agertu dira kontra. Berez 31 epailerena izan behar zen erabakia, baina hiruk ez dute parte hartu hainbat arrazoirengatik.

Espainiako kontsumitzaileen elkarteek nabarmendu dute bankuek irabazi dutela eta herritarrek galdu. Botere judizialaren independentzia auzitan geratu dela ere azpimarratu dute.

Alderdi politikoen artean ere zeresana eman du epaiak. Podemosek “mobilizazio zibikoa” deitu du larunbat honetarako Auzitegi Gorenaren atarian, neurriaren kontra protesta egiteko.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Hipoteken zerga  |  Nafarroa  |  EAE  |  Kontsumitzaileen eskubideak

Hipoteken zerga kanaletik interesatuko zaizu...
2018-11-07 | ARGIA
Hipoteken zerga bankuei ordainaraziko dien dekretua iragarri du Espainiako Gobernuak

Espainiako Auzitegi Gorenak bigarren itzulian erabaki ondoren herritarrek ordaindu behar dutela hipoteken zerga, ezohiko prentsaurrekoa eman du Pedro Sánchez Espainiako presidenteak: dekretua aterako du Gobernuak, hipoteken zerga bankuek ordaindu dezaten. Sánchezek esan du espero duela bankuek bere gain hartu beharko duten kostuak ez diezaiela gero bezeroei eragin.


Azkenak
EGILEA
Eguneraketa berriak daude