2021eko apirilaren 21a
EAEko legebiltzarrak barne-araudia aldatu du eta, EH Bilduk salatu duenez, aurrerantzean zailagoa izango da herritarrek eta eragile sozialek legeen tramitazioetan parte hartzea.
Koalizio soberanistaren oharra jaso du Herrikolore hedabideak. Bertan esaten denez, araudiaren aldaketa “iraina” da eragile sozialentzat eta “negargarria da” beste inor kontra agertu ez izana.
Orain arte elkarteek, taldeek eta gai zehatzetan adituak diren pertsonek EAEko legebiltzarrean hitz egiteko aukera zuten parlamentuko taldeek hala eskatuz gero. Aukera hori ez da desagertuko araudi aldaketarekin, baina murriztu egingo da: agerraldi kopurua gutxituko dute eta haien iraupena ere laburtu egingo da, 15 minutura.
EH Bilduk salatu duenez, beraiek izan dira neurriaren kontra egin duten bakarrak. Uste dute araudi aldaketak “ahots kritikoak isilarazi eta Eusko Jaurlaritzaren lege-proiektuei alfonbra gorria jartzea” duela helburu”.
“Ulergarria da EAJk eta PSEk, alderdi-arrazoiengatik, herritarren parte-hartzea mugatzearen alde egitea, baina erabat ulertezina da Podemosek eta PPk aurka egiteko gaitasunik eduki ez izana”, EH Bilduren oharrean irakurtzen denez.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
