“Ia 200 hizlari izango ditugu gurekin, baita 50 tailer ere, zazpi gai orokorren inguruan”, adierazi du Egoitz Urrutikoetxeak, kontragailurraren antolatzaileetako batek. 40 hitzaldi osorik euskarara, gaztelerara, frantsesera eta ingelesera itzuliko dira. Kapitalismoa, klima eta ingurumena, herrien aniztasuna eta askatasuna, feminismoa, demokrazia soziala eta autoritarismoa, migrazioa eta harrera eta gerren eta inperialismoaren aurkako borrokan elkartasuna izango dira landuko dituzten gai orokorrak.

Lau eremu nagusitan banatuko dira: Irungo Ficoban eta Hendaiako zineman hitzaldi eta tailerrak izango dira; Gazte Gunea Hendaiako Jean Jaures eskolan egongo da; aste intergalaktikoa Kanetako Portuan izango da, eta azkenik, kanpalekuan Jaka Horien herrixka egongo da. Horrez gain, lotarako 2.500 lagunentzat kanpalekua atondu dute Urruñako erlaitzean (Lapurdi). Antolatzaileek argitu dute kanpalekutik gune nagusietara joateko garraio publikoa izango dela.

Hitzaldi eta tailerrez gain, abuztuaren 24an manifestazioa egingo dute, Hendaiako Florida biribilgunetik Irungo Ficobara, 11:00etan. Abuztuaren 25ean, berriz, Miarritze, Angelu eta Baionan (Lapurdi) zazpi leku eta plaza okupatuko dituzte esparru publikoen pribatizazioa salatzeko.

“Ertzaintza prest dago”

Estefania Beltran de Heredia EAEko Segurtasun aholkulariak esan duenez, Ertzaintza “prest dago” gerta litezkeen liskarrak aurreikusi eta gerarazteko. G7ko gailurra eta kontragailurra direla eta, Eusko Jaurlaritzak segurtasun plan berezia garatu du hainbat arazori aurre egiteko: trafiko arazoak, liskarrak… horretarako 4.000 ertzain egongo dira mugatik gertu, Ertzaintzaren pertsonalaren erdia.

Bestalde, Gipuzkoako ErNE Ertzaintzako sindikatuko idazkariak Eusko Jaurlaritzari “planifikazio ona” eskatu dio, eta ahalik eta baliabide gehien bideratzea gerta litezkeen liskarrak “ekiditeko”.