Herri ekimeneko euskal hedabideek elkarlanean sakontzeko apustua egin dute

  • Sektorearen diagnosia eta erronka komunak identifikatzen dituen dokumentua sinatu eta jendaurrean aurkeztu zuten atzo herri ekimeneko euskal hedabideek. Aurrera begira egindako hausnarketan azpimarratu dituzte negozio eredua, lan baldintzak, kalitatea, lehiakortasuna, ikerketa eta elkarlana. Erakunde publikoei ere deia egin diete hausnarketa mahai bateratuak osa ditzaten.

2012ko martxoaren 14a
Prentsaurrekoan Joan Mari Larrarte (Berria), Jasone Mendizabal (Topagunea) eta Xabier Letona (ARGIA) mintzatu dira. (Arg: Dani Blanco)

Topaguneko Jasone Mendizabal, Berria Taldeko Joanmari Larrarte eta ARGIAko Xabier Letona izan ziren prentsaurrekoa aurkeztu zutenak.

"Hedabideek garai zailak bizi dituzte mundu osoan, aldaketa teknologikoak eta krisi ekonomikoak eraginda. Indarrak batzeko premia areagotu du", azaldu zutenez.

Euskararen garapenean eta hiztun komunitatean euskal hedabideek duten funtzio garrantzitsua azpimarratu zuen Mendizabalek, eta lagundu ezean, hedabideok duten egoera zailera azpimarratu zuten, azken urteotan itxi diren euskarazko hedabideak aipatuz: Ttipi-Ttapa Telebista, Geu Gasteiz, Txaparro, Esan-Erran Irratia eta Nabarra, besteak beste.

Sektore ekonomiko gisa ere pisua duen taldea dela nabarmendu dute: 450.000 lagunek jarraitzen ditu hedabideok, 100 komunikabide baino gehiago dira, eta guztira 600 langiletik gora ari dira hauetan lanean.

Aurrera begira bost desafio aipatu dituzte:

1- Interneten inbertsioa egin beharra.

2- Gure produktuen hobekuntza.

3- Berrikuntza eta ikerketa.

4- Elkarlana: bakarka baino batuta egingo diote aurre egoerari.

5- Erakunde publikoen laguntza-politiketan eragitea.

Egin duten diagnostiko bateratua bide baten hasiera dela nabarmendu nahi izan dute. "Dokumentua sinatzea sektore gisa lan egiteko lehen harria da".

- Herri ekimeneko euskal hedabideen prentsa oharra (PDF)

- Atxikimendua adierazi duten hedabideen zerrenda (PDF)

- Aurkezpen osoa Berria.info-k zuzenean eman du eta hemen osorik ikus daiteke.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Euskarazko hedabideak  |  Hedabideak

Azkenak
Azkenak
Eguneraketa berriak daude