Kazakhstango Konstenko ikatz meategian piztutako sute batek gutxienez 45 langile hil ditu, Kazakhstango Larrialdi Ministerioak jakitera eman duenez.

Agintarien eta ArcelorMittal enpresaren arabera, metano-leherketa baten ondorioz piztu da sutea. Istripua gertatu denean 252 langile zeuden meategian. Lurpeko galerietan dagoen azken meatzari baten bila jarraitzen dute larrialdi-zerbitzuek oraindik.

Munduko bigarren altzairugile handienak igorritako komunikatuan nstalazioak "arriskutsuak" direla aitortu dute. 1995ean enpresak erosi zituenetik hainbat istripu izan dira eta dozenaka langile hil diren horietan. Tokiko agintariek azken urteotan azpiegiturak modernizatzeko konpromisoak ez betetzea leporatu diote ArcelorMittali.

Orain arte herrialdeko meategietan izandako tragediarik larriena 2006koa izan da, 41 langile hil ziren Mittal erraldoiaren jabetzako meategi batean.

Euskal Herrian bederatzi lantegi

ArcelorMittal SAk Luxenburgon du egoitza fiskala. 2006an sortu zen, Mittal Steelek Arcelor xurgatu eta fusionatu ondoren. Indiako kapitala da nagusiki, eta Lakshmi Mittal handikiak kontrolatzen du. Multinazionalak bederatzi lantegi ditu Euskal Herrian: Bergaran (Gipuzkoa), Olaberrian (Gipuzkoa), Zumarragan (Gipuzkoa), Berriobeitin (Nafarroa), Lesakan (Nafarroa), Legasan (Nafarroa), Etxebarrin (Bizkaia), Sestaon (Bizkaia) eta Legution (Araba).