Europaren lurreko aztarna ekologikoa mozteko ordua

  • Lurra ez da mugarik gabeko hornitzailea, iturria lehortzen ari gara eta okerragoa dena, ez dakigu zenbateko abiaduran, kalkuluak gardenak ez direlako. Ian Fitzpatrick ingurumen arloan lan egiten duen antropologoak New Internationalisten idatzi duenez, landa-lurren arpilatzea eteteko moduak badira ordea.


2013ko apirilaren 17an - 00:00
Azken eguneraketa: 2015-02-26 13:37:33
Herrialde aberatsek atzerriko lurrak eskuratzeak problema larriak eragiten ditu.

Adam Smithek 1776an Nazioen aberastasuna idatzi aurretik, Fisiokrata izenez ezagunak ziren ekonomialari talde batek ekonomia klasikoaren oinarriak ezarri zituen, lurra deskribatuz aberastasunaren iturri bakar gisa. Smithen obra ezaguna lanaren banaketan eta ekonomia industrialaren garapenean fokatu zen eta zokoratu egin zuen fisiokrazia. Hala eta guztiz ere, fisiokraziaren oinarrizko printzipioak –bizitza, azken buruan, lurrak daukan gaitasunaren menpe dagoela, materialak emateko, hondakinak xurgatzeko eta bere burua berritzeko–, gaur egun inoiz baino egokiago dirudite.

Gutako asko oso kezkatuta gaude gure sistema ekonomikoak planetari eta gizarteari egiten dion kalteaz. Badakigu gehiegi kontsumitzen ari garela eta obesitate epidemikoari aurre egiten diogula, janariaren proportzio handi bat botatzen dugula, gure aztarna ekologikoa Lurraren bio-gaitasunaren gainetik dagoela (behar dugun guztia eman eta gure hondakinak irensteko gaitasunaren gainetik); badakigu munduko biodibertsitatea %30 gutxitu dela 1970etik (…). Baina zifra ikaragarri horiek gure kontzientzian sartu atera dabiltza olio orbana bezala.

Populazioaren hazkundea, elikagaien eskaria biderkatzea, bioerregaiak, zura, mineralak, espekulazio finantzarioa eta frackinga batu eta mundu osoko landa-lurretan trumilka sartzea etorri da. Kalkuluen arabera, 82,3 milioi hektarea erosi dituzte azken hamar urteetan atzerriko inbertitzaileek garapen bidean diren herrialdeetan, munduko landa-eremuaren %1,7 gutxi gorabehera. Bien bitartean, lurrak bereganatzeko prozesu honen benetako eskala ezezaguna da transparentzia faltagatik.

(…)

Europak sei aldiz landa-lur gehiago inportatzen du esportatzen duena baino, 33 milioi hektarea inguru Txinan, 19 milioi hektarea Brasilen eta 12 milioi hektarea Argentinan, bere nekazaritzako beharrizanak hornitzeko. Estimazioek diote basogintzako produktuetarako lurrak gehituz gero, Europar Batasunaren (EB) aztarna ekologikoa lurrari dagokionez bikoitza baino gehiago litzatekeela, 600 milioi hektarearaino (EBren azalera eta erdi handiagoa, hortxe-hortxe).

Lurreko baliabideen dependentzia horrek esan nahi du EBk zuzen-zuzenean lehiatzen duela tokian tokiko jendeen lur premiekin. Lurraren baliabideak geroz eta mugatuago, haiek lortzeko konpetizioak, dudarik gabe, gatazken suak piztuko ditu ekonomikoki edo politikoki ezegonkorrak diren herrialdeetan eta horrek, era berean, hornidura kate funtsezkoak etetea ekar lezake.

(…)

Hainbat talderen koalizioa (Friends of the Earth, ActionAid, Birdlife, Biofuelwatch, Compassion in World Farming eta European Environment Bureau), elkartu da Europako gobernuei eskatzeko eta EBri osotasunean, Europaren lurreko aztarna ekologikoa gutxitzeko. Hidden impacts txosteneko aurkikuntzetan oinarritu dira lurreko aztarna ekologikoa, karbono-aztarnak eta beste kalkuluak izan daitezen neurketa horren abiapuntua. Arrazoitu dutenez, gure beharretarako premiazko ditugun lur kopuruak gutxitzeko, zenbat erabiltzen dugun neurtzen hasi behar dugu.

(…)

Baliabideen neurketa argiagoek ekar dezakete efizientzia handitzea, hondakinak gutxitzea, baliabideen segurtasuna handitzea eta lanpostuak sortzea industria eraginkorragoetan. Lurreko aztarna ekologikoen indarra da, aukera ematen digutela gure kontsumo behar patologikoen eta Lurrak horiek asetzeko daukan gaitasun geroz eta txikiagoaren artean zuzenean ekiteko.


Irakurrienak
Matomo erabiliz
Azoka
Kanal honetatik interesatuko zaizu: Aztarna ekologikoa
Amazonek Nafarroan “eskala handiko” bi zentral fotovoltaiko eraiki nahi dituela dio

Multinazionalak jakinarazi duenez 72 MWko potentzia izango luketen bi "eguzki parke" edo makro-zentral fotovoltaiko eraiki nahi ditu foru lurraldean, baina ez du kokapenaren berri eman. Industria teknologikoan gehien kutsatzen duen enpresetako bat da Jeff Bezos... [+]


Adrián Almazán
“Gizartearen logika algoritmikoarekin, gizakiak esplotatzen jarraituko dugu”

Fisikan lizentziatua eta Filosofia doktore, Gasteizen du ohiko bizitokia Adrián Almazánek (Madril, 1990), baina egun Madrilgo Carlos III Unibertsitatean ematen ditu klaseak. Digitalizazioak ingurumenean, energian eta gizartean sortzen dituen eraginak izan ditu... [+]


2023-11-08 | ARGIA
Aztarna ekologikoa murrizteko neurriak hartzen hasi da ARGIA liburuen eta aldizkariaren ekoizpenean

Kataluniako Ekoedizioaren Institutuko bazkide egin da ARGIA, Europako bakarra, eta Euskal Herrian halako urratsa eman duen lehen eragilea da. Zigilu baten bidez, bere argitalpenen aztarna ekologikoa neurtu eta garbi adieraziko du hemendik aurrera. Dagoeneko sei liburu ekoeditatu... [+]


2023-08-22 | Ilargi Manzanares
Andreu Escrivà: “Kapitalismoaren jasangarritasunak gaur egungo egoera mantendu nahi du, eta sostengaezina da”

El Salto-k Andreu Escrivá ikerlari eta ingurumen-adituari elkarrizketatu du, bere azken liburuaren harira, "Contra la sostenibilidad". Bertan, kapitalismo berdeak bere burua indartzeko erabiltzen dituen estrategiak azaldu ditu, eta nola jasangarritasunaren ideia... [+]


Eguneraketa berriak daude