Asteburuetan ez bada, Iruñeko Jarauta kalea ez da bereziki jendez betetzen, baina kurba egiten duen parte horretan suma daiteke zerbait gertatzen ari dela, Udaltzaingoa baitago aldez alde, goiz, arratsalde eta gau. Kontseilu Sozialistaren parte den Etxebizitza Sindikatuak igandean eman zuen sareetan etxebizitza bloke baten okupazioaren berri. Auzolanerako deia egitea zen asmoa izatez, baita kasua publiko egitea ere, ordurako hainbat egun zeramatzatelako bertan bizitzen. Deialdia egin eta gutxira agertu zen Udaltzaingoa, eta ordutik etengabekoa izan da presentzia. Sindikatuak jakitera eman duenez, 24 orduz dago udaltzain patruila bat ezkaratzean, eta beste bat kanpoan.

“Lehen momentu batean bazirudien sarrailak aldatu eta etxegabetzeak gauzatuko zituztela, eta hori ekidin zen, uste dugu bertan zegoen jendearen presioari esker”, adierazi dio ARGIAri Iker Narbona Etxebizitza Sindikatuko kideak. Jarrera “kontrajarriak” ere sumatu zituzten polizia-agenteen partetik, udaltzain batzuk esaten zutelako etxegabetzeari ekingo ziotela segituan, eta besteek, aldiz, kontrola ezarriko zela. Azkenean, azken hori: sarbide-kontrola ezarri zuen unean bertatik Udaltzaingoak. Alegia, etxebizitzatik ateratzen denari ez diotela atzera sartzen uzten.

Eraikinaren jabetza Pamplona Centro Histórico – Iruña Biziberritzen enpresarena da, eta Iruñeko Udalak du enpresaren partaidetza osoa. Etxebizitza Sindikatuko kidearen esanetan, “desokupazio enpresa faxisten metodoa" darabil udalak: “Saiatzen ari dira ez izatea ohiko etxegabetze bat, herritarrok aurrez planifikatu ahalko genukeena eta erantzun handi bat eman genezakeena, baizik eta isilpean eta higatze luze baten bitartez egin nahi dute, egoera jasanezin bihur dadin bertan bizi direnentzat, ea alde egiten duten etxebizitzatik, ondoren hustu eta sarraila aldatzeko. Azkenean, bertan bizi direnen zaurgarritasun egoeraz aprobetxatzen ari dira”.

Hainbat familia bizi dira

Etxebizitza Sindikatuak ez du zehaztu nahi zenbat familia edo pertsonak okupatu duten etxebizitzaren bat eraikin horretan, intimitatea babeste aldera, baina jakinarazi dute “egoera zaurgarrian” aurkitzen direla. Sindikatuaren arabera, adingabeak dituzten familiak daude bertan, aurretik etxegabetuak izan direnak bai prozedura judizial bitartez eta bai “bestelako prozeduren” bidez, bertan bizi dira baita genero indarkeriaren biktima diren bi emakumeen familiak ere, emantzipatu ezinik dauden gazteak, eta ez hain gazteak ere bai, dituzten soldatekin alokairu kontraturik ordain ezin dezaketenak. “Askotariko perfilak dira, baina azkenean egiturazko arazo baten isla da: proletalgoak etxebizitza sarbidean dituen arazoak”, dio sindikatuko kideak.

Eraikin osoa ez dute okupatu; pisu batean bizilagunak daude. “Poliziari adierazi diote egunak daramatzatela eraikinean bizitzen, igandea baino lehenagotik, eta beraz, esan diote Poliziari ilegala dela egiten ari direna”. Eraikinaren gainontzeko etxebizitzak, oraintsu okupatu dituztenak, urteak zeramatzaten hutsik kasurik gehienetan.

“Etxegabetze ilegala da”

Udalarengana jo dute Etxebizitza Sindikatuko kideek, baina ez diete entzun nahi izan. Orduan, astelehen arratsean, eraikinaren jabea den Iruña Biziberritzen enpresaren bulegoetara joan ziren, zalaparta sortu zuten, eta ordezkari batekin hitz egitea lortu. Adierazi zizkieten exijentziak, baina ez dute erantzunik jaso.

Sarbide-kontrola kentzea da eskatzen duen lehenbiziko gauza, alegia, jendeari sartzen eta irteten uztea, oinarrizko eskubideak direlako. Ez dakite, gainera, prozedura judizialik dagoen abian: “Ez dugu ikusi agindurik, ez salaketarik... Horregatik, jendearen eskubide formal guztiak urratzen ari dira. Etxegabetu nahi badituzte, prozedura judizial bat egon beharko litzateke”.

Astearte iluntzean, elkarretaratzea

Arratsalderako protesta deituta zegoen Iruñeko Jarauta kalean, “etxegabetze ilegala” salatu eta elkartasuna adierazteko barruan daudenei. Udaltzaingoaz gain, Foruzaingoa eta Espainiako Polizia ere bertaratu dira Jarauta kalera, Gedar-ek sareetan jakitera eman duenez.