Elebeltz Topaguneko kide bat identifikatu eta hainbat kide galdekatu dituzte Lasarteko udaltzainek
Lasarteko udaltzainak igande goizean bertaratu ziren Elebeltz gaztetxera, hainbat kide bertan zirela. Hala, pertsona bat identifikatzeaz gain, gaztetxeko hainbat kideri galderak egin zizkieten. Bestalde, guneari argazkiak atera zizkioten poliziek.
Iragan larunbatean ospatu zuten Lasarte-Oria Festibala, Lasarte-Oriako (Gipuzkoa) gaztetxean; hau da, Elebeltz Eztabaida eta Sorkuntza Askerako Topagunean. Igande goizean, Elebeltzeko lau kide gunea garbitzen ari zirela, Lasarteko udaltzainak bertaratu eta sartu ziren. Hasiera batean, nortasun agiria eskatu zieten barruan zeuden lau pertsonei. Hala, pertsona bat identifikatu zuten, eta argazkia atera zioten nortasun agiriari.
Elebeltzeko kideek GEDAR LANGILE KAZETAri jakinarazi diotenez, ostean, guneari ere argazkiak atera zizkioten poliziek. Horretaz gain, bertan zeuden lau kideei hainbat galdera egin zizkieten; Elebeltzeko elektrizitate hornikuntzari edota instalazioei buruz, besteak beste. Kanpora irten ziren gero, eta azkenean, alde egin zuten.
Ordu batzuk lehenago ere gaztetxe inguruan izan ziren udaltzainak; hain zuzen, goizaldeko 03:00ak aldera. Autoan bertaratu ziren, baina ez ziren gunera sartu. Atetik begiratu ondoren, joan egin ziren.
Elebeltz, zazpigarren urteurrenaren atarian
2012. urtean birjabetu zuten gaur egun Elebeltz modura ezaguna den eraikina. Duela bi urte inguru, Lasarteko Udalak gaztetxekoei jakinarazi zien desalojo arriskuan zegoela birjabetutako espazioa. Elebeltzeko hainbat kidek azaldu dutenez, "herri plataforma baten bidez lortu zen hori geldiaraztea". Dena den, ordutik hona, "udaltzainen presentzia handia" edota "enpresa eraikitzaile bateko kideen presentzia zein iradokizunak" -udaletxeak eremua enpresa eraikitzaile bati saldu ziolakoan daude gaztetxeko kideak- salatu dituzte inguruko bizilagunek zein Elebeltzekoek.
Eraikinetik ateratzeko agindua eman diete Zestoako Gazte Asanbladako kideei, eta prozesuaren gastuak ordaintzera zigortu dituzte. Gaztetxearen defentsan mobilizatzera deitu dute igandean, otsailak 4, Zestoako plazatik.
Zestoako Elizondo eraikina gaztetxe berri gisa okupatu zuen Gazte Asanbladak. Eraikina Elizaren jabetzakoa da, eta gotzaindegiak gaztetxearen aurkako prozedura abian du. Protesta ekintzak nagusitu dira azken asteetan, igandean Zestoako elizan, esaterako. Zestoako Udalak adierazi... [+]
Zestoako Gaztetxearen kontrako prozedura judiziala mantentzen du Elizak: asteazken honetan izango da epaiketa. Aurreko ostiralean, Gaztetxearen aldeko elkarretaratze bat izan zen Donostiako Artzain Ona katedralean.
Kontzertuetarako materiala eta baliozko tresnak eraman dituzte.
Ez Dago Hilda festibalaren antolakuntzak azaldu duenez, festibal honen helburua dirua lortzea izanen da Iruñerriko eszena autogestionatuak behar duen entsegu espazio bat eskuratzeko. Urriaren 28an Berriozarko Ilargi parkean ospatuko da hirugarren edizio hau.