"Bankari eta enpresari handien ofentsiba" salatzeko, larunbatean, milaka lagun irten dira protestara Bilbo eta Iruñeko karriketan Gazte Koordinadora Sozialistak deituta.

"Energia konpainiek, supermerkatu kate handiek, armagintzako enpresek, banku zentralek eta abarrek sekulako negozioa egin dute 2022an, mundu guztiko langileen egoera erabat okertu duten bitartean", adierazi dute antolakundeko eledunek manifestazioaren amaiera ekitaldian. "Politikari profesionalek duten erantzukizuna" ere salatu dute, "oligarka finantzarioaren eta Europar Batasunaren guztiz menpeko" direla adieraziz eta haien lana delako "langile klaseari ezarri dioten miseria soziala kudeatzea.

Europa Ekialdeko gerra ere izan dute hizketagai, batez ere seinalatzeko langileen pobretzea "areagotu" baino ez dela egiten: "Ez daukate dirurik herritarren bizi baldintzak hobetzeko, bai ordea beraien interes partikular zapaltzaileak defendatzeko".

Edonola ere, mezua ez diete bankari, enpresari eta politikariei zuzendu: "Bizi dugun egoerari aurre egiteko erreminta propioak behar ditugu; subjektu politiko independente bihurtu behar gara". Norabidea Estatu Sozialista dela azpimarratu dute, horrexek izan behar duelako "maila internazionalean jarduteko batasun estrategikoa".

Parte hartze datuei dagokienez, antolatzaileen arabera 7.000 lagun batu dira Bilbon eta Iruñean. Naizek 4.500eko datua eman du, eta El Correoren arabera, Bilbon 3.000 manifestari elkartu dira, Naizek adierazi bezala.