Azken agurra Nestor Basterretxeari Donostian
Senideak, lagunak eta euskal gizarteko ordezkariak bildu dira astelehenean Nestor Basterretxearen hiletan. Donostiako Zorroaga eliza izan da eskultore bermeotarraren omenezko ekitaldia ospatzeko aukeratutako lekua, nahiz eta ez den hileta erlijiosoa izan.
Ekitaldia Jon Maiaren dantzarekin hasi da, eta ondoren Kukai Dantza Taldeak, Andoni Egaña bertsolariak edota Bermeoko koruak aritu dira.
Basterretxearen lagunek eta senideek, tartean, poemak eta testuak irakurri dituzte. Atzean, pantaila erraldoi batean, eskultorearen obren irudiak proiektatu dira.
Iñigo Urkullu lehendakaria, Juan Jose Ibarretxe eta Carlos Garaikoetxea lehendakari ohiak eta Martin Garitano Gipuzkoako ahaldun nagusia hiletan egon dira, beste alderdietako ordezkariekin eta agintariekin batera.
Kultura arloko ordezkariak ere hurbildu dira Zorroagara. Bertan izan dira, adibidez, Ricardo Ugarte eskultorea, Julia Otxoa idazlea edota Gontzal Mendibil abeslaria.
Nestor Basterretxearen gorpua astelehenean bertan erraustu dute. Bere errautsak Bermeon eta Hondarribiako Jaizkibel mendian botatzea nahi zuen.
