Norvegiako kultura ministro Thorhild Widvey-k azaldu eta BBCk jaso duenez, irrati digitalak (DAB) “kalitate handiagoko audioa eta beste hainbat erabilpen” ekarriko ditu. Gaur egun 22 irratik emititzen dute digitalean Norvegian eta beste 20 katerentzako tokia dago. FMn emititzen duten bost irrati nazional geratzen dira.

Digitalean emititzea FMn egitea baina zortzi aldiz merkeagoa da azaldu dutenez. Norvegiako Kultura Ministerioren kalkuluen arabera, DABean emititzeak urtean 25 milioi dolar aurreztea suposatuko du. Hori, digitalean emititzeak askoz ere energia gutxiago kontsumitzen duelako da, hein handi batean.

Gailuak egokitu beharko dira

Aldaketak kritikak ere sortu ditu norvegiarren artean. Eskandinaviar askok irratia FM eta AM bidez entzuten jarraitzen dute eta arazo moduan ikusten dute aurrerakuntza.

Telebista analogikotik digitalera aldatzean, hargailu bakarra zen moldatu beharrekoa. Irratiaren kasuan, aldiz, irratia seinaleak jasotzen dituzten hainbat gailu egokitu beharko dira prestatuak ez daudelako: irrati normalak, autoetako irratiak eta smartphoneak, adibidez.