2013 eta 2017koen ostean, hirugarren aldia da lurralde horietako euskaltzaleek Arabako Errioxako eta Vianako Korrika antolatzen dutela. Aurrekoak ez bezala, aurtengoa AEKrekin eta Korrikarekin elkarlanean antolatu dute. Beren lurraldean euskararen alde egiten den lana aldarrikatu eta hauspotu nahi dute Vianako (Nafarroa) eta Arabako Errioxako euskaltzaleek.

Egitarau mardula

Larunbat goizean zutabe bana abiatuko dira Vianatik eta Bastidatik, eta Guardian elkartuko dira arratsaldeko 17:30ak aldera. Aurretik, ostiralean, Korrika txikiak antolatu dituzte hainbat ikastetxek  Bastidan, Guardian, Lapuebla de Labarcan, Lantziegon, Oionen eta Vianan.

Egitarau mardula osatu dute euskaltzaleeek Guardiako larunbat arratsaldeko ospakizunerako: Izango dira haurrentzako tailerrak eta eskulanak, kale animazioa trikitrilari eta txistulariekin, bertsolariak edo  kontzertuak.  Dupla, Astoratuak, Eh Mertxe! eta Azken Hatsa taldeek kontzertua emango dute.