Asteartean egindako adierazpenetan, alarma-egoera ez luzatzeko aukeraz mintzatu da Espainiako Gobernuko presidentea. Hala izan dadin, ezinbestekotzat jo du txertaketa masiboari dagokionez Espainiako Osasun Ministerioaren aurreikuspenak betetzea eta kutsatzeen berragertzeak ekiditea. Laugarren olatu bat ekidin eta ezohiko egoera deuseztatzeko esperantzak txertaketan jarri ditu Sanchezek.

Aipatu aurreikuspenen arabera, maiatzaren lehen asterako Espainiako Estatuko 3 milioi biztanle egon beharko lirateke txertatuta, ekainerako 10 milioi izanik txertoa jasotakoen kopurua, eta 33 milioikoa abuztuan; abuztuan txertatutakoen zifra hori izanez gero, estatuko biztanleriaren %70a barnebilduko luke.

Alarma-egoera gehiago ez luzatzeak berekin ekarriko luke herritarrei ukatu zaizkien hainbat oinarrizko eskubide gehiago ez ukatzea, mugikortasun librea kasu, eta etxeratze agindua indargabetzea. Autonomia-erkidegoen arteko mugikortasunak ez luke mugarik, nahiz eta erkidego bakoitzak eskumena izango lukeen bere baitako eskualde eta udalerrien arteko mugikortasuna arautzeko.

Gauzak hala garatu daitezen, farmazialariek beren konpromisoak betetzea eta giza baliabideak optimizatzea ezinbestekotzat jo du txertaketa planaren parte den Erizaintza eta Txerto Elkarteko Jose Antonio Forcadak, eta helburu hori lortzera bidean osasun langileen jai egunak jarri ditu airean: “Posible da dosi denak behar bezala jasoz gero, ondo antolatuz gero, eta pertsonala prestatuz gero. Jai egunetan eta zubietan ixteaz ahazten bagara (…) Ixten den igande bakoitzeko 400.000 dosi jarri gabe geratzen dira, eta hamar igande txertatu gabeko 4 milioi herritar dira”, egindu irakurketa ElDiario.es-ek jaso duenez.

Alabaina, Forcadak onartu du AstraZeneca txertoaren gainean egindako segurtasun analisiak eragina izan dezakeela txertaketan.

Urkullu, desados

Iñigo Urkullu lehendakariak desadostasuna agertu du Sanchezen adierazpenen aurrean, iritzirik hark plazaratutakoak ez direla autonomia-erkidegoekin batera onartuak izan. Intzidentzia tasa hainbeste jaitsiko ote den zalantzan jarri du, baita txertaketa hain aurreratua egongo ote den ere. Egun, EAEko kutsatze tasak Espainiako Estatuko bataz bestekoa bikoizten du.