ARGIA.eus

2021eko irailaren 23a

'Aiurri', hilabetez geldirik

  • Gipuzkoako Aiurri hamabostekaria eta astekaria itxi egingo dira hilabeterako; eta langileei erregulazio espedientea ezarriko zaie. "Aurrez ere baziren korapilo eta oztopoak are gehiago korapilatu direlako hartu dugu erabakia", dio Aiurrik plazaratutako oharrak.

ARGIA @argia
2013ko urriaren 24a
"Tolosaldeko egitasmo bateratuak" euren proiektuari "kalte" egin diola esan dute Aiurriko kideek.

Aduna, Andoain, Asteasu, Larraul, Urnieta, Villabona eta Zizurkilgo berriak ematen ditu Aiurrik. Azaroko geldialdiaren ostean, abenduaren 5ean banatuko dute hurrengo aldizkaria. Webgunean ere etenaldia egingo dute.

"Urtea amaitu aurretik, arre edo so egin beharrean aurkitu du bere burua Larramendi Bazkunak. Hilabeteko etenaren arrazoiak sosekin lotuta daude hein handi batean; bizi dugun krisialdiak ez dio inori laguntzen, jakina denez, ezta euskalgintzari edota euskal komunikabideoi ere", dio oharrak.

"Aiurri aldizkariak hiru zutoin nagusi ditu aurrera egin ahal izateko: erakundeen diru-laguntzak, publizitatea eta harpidedunak. Bada, hiru zutoinetatik lehen biek behera egin dute", jarraitzen du. "Datu bat baino gehiago aipa daiteke, baina horien artean aipagarrienetakoa, Villabonako Udalaren diru-laguntza jaitsiera da".

Tolosaldeko egitasmo bateratua, "kaltetan"

Aiurriko kideen hitzetan, "Tolosaldean sortu den komunikazio taldearen –zeinetan Hitzak, Galtzaundi aldizkariak eta Txolarre irratiak parte hartzen duten–, egitasmo bateratuak ez dio Aiurri aldizkariari batere lagundu aurrera egin dezan".

"Azken urteotako egoera ekonomiko ilunaren baitan eta zer esanik ez idatzizko komunikabideak hartzen ari diren norabidearen aurrean, dudarik gabe, indarrak batu eta eskualdekako komunikabideak elkarlanean jardutea nahitaezkoa da".

"Bada, Tolosaldeak eman du pauso hori dagoeneko eta proiektu hori gauzatu ahal izateko Aiztondoko Udalen babesa ere izan dute. Eskualdeko hainbat Udalek (Amasa-Villabona, Asteasu, Larraul, Aduna eta Zizurkil tartean) Tolosaldeko Komunikazio Taldearen (TKT) eskaintzarekin bat egin dute, kasu gehienetan, gure kalterako. Haiei eskainitako diru-laguntzak, gurea gutxitzea ekarri baitu kasuren batzuetan".

"Argi esan behar da Aiurri egitasmoa proiektu horretatik kanpo geratu dela: Tolosaldeko hedabideen artean gauzatu baitute euren apustua, Aiztondokoa kanpoan utzita. Aiurriko kideon galdera: Zer gertatuko da gurekin?"

Aurrera begira

Traba administratiboak gainditu eta proiektuak aurrera egitea desio dute sustatzaileek: "Azken hilabetean Aiztondoko Udal ordezkarien aldetik hitz baikorrak jaso ditugu. Badirudi Aiurri aldizkaria proiektu komunikatibo bezala gustuko dutela eta aurrera begira ere mantendu egin nahi dutela. Ea guztion artean oztopoak gainditu eta aurrera egitea lortzen dugun, Aiurri indarberrituaren alde".

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Aiurri  |  Euskara  |  Aiurri

Aiurri kanaletik interesatuko zaizu...


Azkenak EGILEA
Argia buletina
Egunaren laburpena
zure e-postan
Eguneraketa berriak daude