ARGIA.eus

2021eko ekainaren 20a

2021eko ikus-entzunezko Argia Saria: 'Hondar Ahoak' telesaila

  • Txintxua Films ekoiztetxeak ETBrentzat sortutako thrillerra da aurtengo ikus-entzunezko Argia Sariaren irabazlea. Koldo Almandoz zuzendariak eta Marian Fernandez ekoizleak jaso dute saria.

ARGIA @argia
2021eko otsailaren 01a
Argazkia: Dani Blanco

Lehenago ere esana dugu ARGIAn, aurtengo ikus-entzunezkoen sariak inflexio-puntu bat markatu du euskarazko telesailen historian. Lehen musika doinu eta irudietatik ikus-entzulea harrapatua geratzen da, sumatzen du datorrena ez dela ohikoa euskarazko telesailen sorkuntzan eta adi paratzen da aparailuaren aurrean, datorkionaren aurrean urduri ere bai akaso. Lehen kapituluak eman du ezustekoa, eta ondorengoek dotoreziaz eramaten dute aurrera ikus-entzulea, une bakoitzean hurrengoan zer gertatuko den asma ezinean.

 

 

Portua, arrantzaleak, izotza, droga, mafia usain sarkorra... nor den nor eta zer egingo duen ongi asmatu ezin den panoraman. Desagertu bat, psikologoaren terapia egiten duen Ertzaintzaren detektibea, herrikoa den polizia gazte eta misteriotsua, trapitxero txikiak eta handiak. Mendebaldeko hamaika portutan gertatutakoak, orain gurean fikzio bidez, baina errealitatetik gertu ere bai, oso gertu.

Thriller poliziako on baterako osagaiak dagoeneko hor daude, baina aurtengo ikus-entzunezkoen irabazlea harago ere badoa, telesailak autore-lan baten printzak erakusten ditu: etxe honetako kazetariak dioen gisan, ekoizpen honetan badago urdin berdekara bat, “Almandoz Kolorea”.

Telesailaren egileek portuan azaltzen duten bezala, presaka egin behar izan dute lana, arnasestuan, eta arantza hori haiekin daramatela ikus liteke haiekin egin dugun elkarrizketan. Pozik dira emaitzarekin, baina euskal sortzaileentzat duintasuna ere aldarrikatzen dute.

Horregatik guztiagatik, aurtengo ikus-entzunezkoen saria, Hondar Ahoak telesailarentzat da.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Argia Sariak 2021  |  Telesailak  |  Ikus-entzunezkoak

Argia Sariak 2021 kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude