Emakumeak borrokan

18 atxilotu SGAEko eta telebista kateetako iruzur batekin lotuta

  • SGAEren Madrileko egoitzan sartu da Espainiako polizia nazionala berriz ere, 18 pertsona atxilotu, 16 miaketa egin eta 20 informazio eskatze egin dituzte “gurpilaren eskandaluarekin” lotuta. SGAEko hainbat bazkidek eta telebistako kateek goizeko ordu txikietan jarritako musikagatik jaso dituzten milioika euro ikertzen ari dira. Tartean EITBko egoitzan izan da polizia informazioa eskatzen.

Xalba Ramirez @xalbaram
2017ko ekainaren 21a

“Gurpila” gisa ezagutzen den telebistako praktika eramaten zuten aurrera atxilotuek. Ordu txikietan jartzen diren giro musikalak “kalitate baxuko musika edo moldaketa faltsuak dira” poliziaren arabera, telebistako musika argitaletxeek egile eskubideengatik ordaindu behar dutena poltsikora itzultzeko beren-beregi sortuak.

Bazkide gutxi batzuek kontrolatu dute sistema hau, milioika euroko irabaziak jasoz, pop izarrek baina irabazi handiagoak lortzeraino. Ez da diru kontua soilik, irabazi handienak dituztenek botere gehiago baitute elkartean. Beste gatazka batzuen artean, gurpilaren auzia izan zen 2013an Anton Reixa SGAEko zuzendari ohiaren dimisioaren arrazoi nagusietako bat. Reixak 2006 eta 2012 urteen artean 25 milioi euro fakturatu zituzten hamaika bazkideren zerrenda egin zuen.

Zergatik sortzen ditu horrenbeste irabazi “gurpilak”?

Telebista kateek musika erabiltzeagatik SGAEri zenbateko bat ordaindu behar diote, eta diru hau autore eta editoreen artean banatzen da. Joan den hamarkadan, telebista kateek beren musika argitaletxeak sortu zituzten eduki musikal propioak erabiltzeko. Autoreek, telebistako editoreek hala eskatuta, konposizio propioak edo jabetza publikokoak diren obren moldaketak egiten dituzte.

Gurpilarekin zer ikusia duten konposizio gehienak gauez emititzen dira, txapelketa telefoniko eta gisako programetan. Audientzia soilik %1a den arren, denbora tarte zabala dute eta pieza musikal mordoa sartzen da. Telebistak SGAEri ordaintzen dionaren %60era iristen dira gaueko saioak.

Praktika honek sortzen dituen egile eskubideak honela banatzen dira: %50 telebistek sortutako argitaletxeentzat, %20-30 bitartekarientzat eta gainontzekoa egileentzat. Modu honetan, urtean 9 milioi euroko zifrara heldu izan da telebistara itzultzen den kopurua.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: SGAE  |  EITB  |  Ustelkeria  |  Telebista  |  Bilbo

SGAE kanaletik interesatuko zaizu...
Azkenak
EGILEA
Eguneraketa berriak daude