Extra! Extra!

Aktoreen eta kazetarien arteko kimikaz

2010-09-24 18:22:58 | Mikel Garcia

Barney’s Version filmaren prentsaurrekoan izan naiz. Pelikularen bi ekoizleez gain, aktore protagonistak (argazkian) izan dira: Paul Giamatti eta Rosamund Pike. Galdera luzatu die kazetarietako batek bi aktoreei: “Nola lortu duzue zineman hain zaila den gauza hori, protagonisten arteko kimika?”. Finean, historiara pasa diren film asko eta asko horrek sustengatu ditu funtsean: protagonisten arteko kimikak, zera magiko hori, sinesgarri bihurtzen duena Giamattik antzezturiko pertsonaia zabarrak eta Pikek interpretaturiko neska finak elkar maite dutela.

 

(Guztia irakurri)

Zinemaldia erraustegiarekin bat

2010-09-23 17:03:06 | Gorka Bereziartua

Kazetari askoren aurrean egin dute, baina ematen du inor ez dela konturatu. Bilatu arren, ez duzu aferari buruzko albisterik aurkituko Interneten. Idatzita geratu behar da ordea. Norbaitek salatu behar du krimena.

 

(Guztia irakurri)

Euskal glamourra…

2010-09-23 03:42:42 | Mikel Garcia

Euskal Zinemaren Gala ospatu zen atzo gauean. 20:30ean, Victoria Eugenia aurrean, jende ugari zegoen alfonbra beltzari begira, euskal star systema ikusteko zain. José Coronado omen zen esperoenetako bat (?). Itxaroten zegoen kaleko jendea elkarrizketatu zuen zuzenean ETBko esatariak, eta horietako batek, erantzun bitartean, mugikorretik hitz egiten jarraitu zuen, lagunari abisatzeko telebista piztu zezala, agertzen ari zela. Hori ikuskizuna! Bitartean, ni ezin sartu Galara, gonbidapen berezia behar omen zen-eta. Azkenean, arduraduna-edo gerturatu zitzaidan: “¿Tú eres de?”. Eta nik: “Argia”. “Ya… Cubrís todo lo vasco y eso ¿no?”. “… Sí”. “Bien, pues toma”. Eta pasea eman zidan.

 

(Guztia irakurri)

Rebordinosen erronka: euskal zinemagintzaren Zinemaldia egitea

2010-09-22 18:57:26 | Mikel Garcia

Ezohikoa izan da Debekatuta dago oroitzea pelikulako zuzendari eta protagonistek eskainitako prentsaurrekoa: datorren urtetik aurrera Zinemaldiko zuzendari izango den José Luis Rebordinos egon da, eta bera ez da egoten prentsaurrekoetan. Zergatik? “Espreski erakutsi nahi diodalako nire babesa euskal zinemagintzari eta modu honetan iragarri nahi dudalako Zinemaldiak izan behar duela euskal zinemaren Zinemaldia”. Urtarrilean kargua hartu bezain pronto, euskal ekoizleekin bilduko omen da.

 

(Guztia irakurri)

Prentsa aretoan, Lost in translation

2010-09-22 18:17:03 | Gorka Bereziartua

Atzoko txineraren apologiaren ondoren, kasualitatea, ekialde urruneko beste hizkuntza bat tokatu behar gaur: japonieraz aritu da Naomi Kawase prentsaurrekoan, Genpin filmari buruz. Eta, traduttore tradittore, informazio asko galdu da haren hitzak espainolera itzultzean.

 

(Guztia irakurri)

Zinema sozialaren izenean, edozer

2010-09-21 21:04:10 | Mikel Garcia

Zabaltegi Topaketetan, Carancho filmaren zuzendari Pablo Traperori galdetu diote ea bere filmetan salaketa soziala egitea atsegin duen. Bere hitzetan, “pelikula bati salaketa soziala eskatzea, gehiegi eskatzea da. Pelikulak lehenengo pelikula moduan funtzionatu behar du, eta ondoren agian, tertulian, lagunekin kafe bat hartzen edo dena delakoan, beste hainbat hausnarketa sor ditzake”. Kontua da, bideraturiko hausnarketa faltsua, manikeista eta manipulatua egiten dela sarri, zinema sozialaren aitzakiapean.

 

(Guztia irakurri)

Egin ezazue txineraz!

2010-09-21 14:42:25 | Gorka Bereziartua

Galderak inor sorpresan harrapatzen ez duen arren, giltzurruneko harriekin legez, zaila da ohitzea. Elisa K filmaren prentsaurrekoan kazetari batek, Judith Colell eta Jordi Cadena zuzendariei: “Katalanez egin duzue filma; pentsatu al duzue horrek merkatu nazionalean zabaltzeko ekar ditzakeen oztopoetan?”.

 

(Guztia irakurri)

Sutea Victoria Eugeniako transformadoreetan

2010-09-21 12:55:27 |

Eguerdiko 12:00ak inguruan, Victoria Eugenia antzokian proiektatzekoak ziren filma bertan behera utzi behar izan dute, antzokiko transformadore batek sua hartu baitu. Parte Zaharreko zenbait eraikinetan elektrizitatea moztu egin da eta suhiltzaileek joan behar izan dute.

Mikel Iturriak sareratu du ondorengo bideoa, eta bertan ikusten da kea.

 

(Guztia irakurri)

Juliaren zirkua

2010-09-20 16:51:55 | Gorka Bereziartua

Elefante bat balakatzen du Julia Robertsek Eat, pray, love filmean. Baina animaliak, gaur, beste nonbait zeuden. Pelikula aurkezteko (esateko modu bat da) antolatu duten prentsaurrekoan argazkilariak lehoi gosetu bihurtu dira, harrapakina objektiboarekin nork ehizatuko; kazetari batzuk berriz hienen moduan, barre aspertuan aritu dira. Zirkua Kursaalean. Juliaren zirkua.

 

(Guztia irakurri)

Gidoia: funtsezkoa batzuentzat, ez beharrezkoa besteentzat

2010-09-20 15:57:25 | Mikel Garcia

Gidoi on batekin pelikula txarrak egin daitezke, baina gidoi txar batekin inoiz ez duzu pelikula onik egingo. Zuzendari bati baino gehiagori entzungo diozu hori. Baina zein garrantzia du gidoiak pelikulan? Ondo lotua izan behar da ala errodajearen gorabeheren menpe utzi beharko litzateke? Eta hirugarren aukera: gidoia bera baztertzea. Hona Zinemaldian filma aurkeztu duten bi zuzendariren hausnarketa kontrajarria:

 

(Guztia irakurri)

Merezitako saria film polemikoetan iaioa denari

2010-09-19 18:33:24 | Mikel Garcia

Xabier Elorriagak “Zinemari eskainitako bizitza” saria jaso du gaur arratsaldean, Kutxak antolatuta. Gerra Zibilak exiliatuta, Venezuelan jaio zen aktore euskalduna, 1944an. Euskal Herriko zinemagintzan mugarri eta polemika iturri izan diren hiru lanetan hartu du parte: Segoviako Ihesa, Mikelen heriotza eta Ke arteko egunak.

 

(Guztia irakurri)

Gaizo Maragall, maite zaituzte gehiegi

2010-09-19 15:34:53 | Gorka Bereziartua

Txalo zaparrada sartzean, txalo zaparrada irtetean. Sail Ofizialean orain arte harrera beroena izan duen pertsonak ez dauka zerikusirik zinema munduarekin. Politikari izandakoa da, figura publikoa, Pasqual Maragall, Kataluniako Generalitateko presidente ohia. Alzheimerra dauka, eta gaitzak nola eragin dion azaltzen du Bicicleta, cullera, poma dokumentalak.
 

 

(Guztia irakurri)

“Burokrazia da protagonistaren benetako etsaia”

2010-09-18 19:44:28 | Mikel Garcia

Paul Conray estatubatuarra kamioilari ari da Iraken. Dirua lortzeko helburuarekin, bahitu, hilkutxa batean sartu eta lurperatu egingo dute han. Orduak baino ez zaizkio geratzen lurrak itota edo oxigeno faltagatik hiltzeko, eta hala ere, Buried pelikulako zuzendari Rodrigo Cortésen hitzetan, “burokrazia da Paul Conray-ren benetako etsaia”. Langile den enpresarekin, AEBetako enbaxadarekin, FBIarekin, segurtasun erakundeekin… desesperatuki hitz egingo du Conrayk sakelakoaren bateria agortu aurretik. Baina burokraziari ez zaizkio pertsonak axola, sistemaren ordena baizik.

 

(Guztia irakurri)

Giro ofizialetatik kanpo ere bada Zinemaldirik

2010-09-18 17:42:41 | Gorka Bereziartua

Egutegi laburxeagoa, medio ekonomikoak urri, esponsor handi-mandirik ez… Baina, zer axola dio? Antiguako eta Alde Zaharreko Gazte Asanbladek ere Zinemaldia antolatu dute, irailaren 21etik 25era.

 

(Guztia irakurri)

Zinema mexikarrak ere iraultza beharko luke

2010-09-17 15:42:00 | Gorka Bereziartua

Mexikoren historia eta hango zinemaren egoera: horiek Felipe Cazals zuzendariak Chicogrande filma estreinatu osteko prentsaurrekoan gehien erabili dituen gaiak. Sail Ofiziala zabaldu duen filma XX. mende hasieran dago girotua, Pancho Villaren iraultza garaian.

 

(Guztia irakurri)