Anuntxi Arana Eraikizan taldeko feminista da eta erabili.com-en idatzi duen artikuluan galdetzen du ea ‘jendarte’, eta oro har ‘jende’, erabiltzea saihestu behar den erromatarren garaian ‘gens’ kontzeptua baztertzailea zelako. Oker ez bagaude, Angel Errok Berria egunkarian otsailean argitaratu zuen “Jendartea” izenburuko zutabeaz ari da. Aranak ondoko hausnarketa egin du artikuluan: “Entzuten den azkena da ‘jende’ oso desegokia dela, latinezko ‘gens’ hitzetik heldu delako, hau da kontzeptu guztiz baztertzaile batetik. Ai ene, berriro ere! Hiztegi zaharrera jo eta (espainolez, bistan dena): ‘gens-gentis: linaje, familia // estirpe // raza de pueblos, pueblo’. Eta gero, kontzeptua zulatu nahiz, artikuluetara. Bai, gens horiek familia nobleak ohi zirela, baina ez arras eta ez beti (jus gentium bazen… eta bada). Dena dela, norbaiti esaten badiogu ideal ‘noble’ak dituela, ez zaio gaitzituko, ezta? Beraz, denei ‘gens’ deitzea ere ez da laido bat…”

Aranaren ustez, gaia ez da filologikoa, beldur lainoa baizik: “ ‘Jendarte’ erabiltzean ez zaie gizonei gizatasun miligramo bat ere kentzen. ‘Gizarte’ren antonimoa ez da ‘jendarte’; izatekoz ‘emarte’ edo holako zerbait litzateke, eta inork ez du egundaino horren antzekorik asmatu. Soilik bakoitzari berea eta orori ororena: jendartean sexu eta genero guztiek dute lekua”.

Joan den otsailean, honela zioen berriz Angel Errok: “Etimologia azken ondorioetara eramanen bagenu (zientzia den heinean, haren ekarpenak faltsugarriak direla alde batera utzita), mutu geldituko ginateke. Zergatik ez ‘jendarte’ ere baztertu, ‘gens’ hitz patrizio eta klasistatik datorrelako? Etimologia aho biko ‘armagnac’ bat da”.

Emakundek 2008an Amelia Barquínek zuzendutako “Euskararen erabilera ez sexista” gidaliburu interesgarria argitaratu zuen. Badu atal bat ‘giz-‘ erroaren erabilera generikoaz, eta ‘jendarte’ eta ‘gizarte’ moduko terminoen erabileraz dauden iritziak bilduta daude.