Aipatu ekintzak, gainera, hainbat urtez egin dira eta inoiz ikusi ez da arrakasta izan dute Gipuzkoan. Hain zuzen, EMAKen laguntza jaso duten honako proiektuez ari gara: “Emakumea Surflari”, Gipuzkoako Surf Federazioak antolatuta, eta 2014, 2015 eta 2016an hurrenez hurren, 72, 128 eta 210 partaide izan dituena; “Emakumea Piraguista”, Gipuzkoako Piraguismo Federazioak antolatuta, urtero 30 partaide izan dituena; eta Emakumea Arraunlari, 2013an Zarautz Arraun Elkarteak sortua, ia 50 partaiderekin, eta aurten bi emakume arraunlari ohik berriz abian jarri nahi zutena eskariari erantzuna emateko.

Uste dugu Gipuzkoako Foru Aldundiak ez dituela behar bezala babestu proiektu hauek eta erakunde publikoa den heinean behartuta dagoela berdintasun politikak eremu guztietan bermatzera, kasu honetan, kirol eremuan. Bide batez, esan behar da berdintasunarekin eta kirolean emakumeen partaidetzarekin benetako konpromisoa duten emakume surflari, piraguista eta arraunlariek diseinatutako eta garatutako proiektuak direla.

Aldundiak benetan, azaltzen duen moduan, kirolean emakume eta gizonen berdintasuna sustatze aldera lana egingo balu, ez luke utziko Emakumea Surflari diru-laguntza gabe; Emakumea Piraguista proiektuan hastapenari jarraipena emateko egin dituzten hobekuntzak zein diren jakin nahiko luke; eta hobeto babestu izango lituzke Emakumea Arraunlari berreskuratu nahi izan duten arraunlari ohiak. Aitzitik, Aldundiak, proiektu hauek noraezean uzteaz gain, haien sustatzaileak ere utzi ditu noraezean. Dakigula, Kirol Zuzendariak ez ditu haiek bidalitako mezuak erantzun hasierako agintzaz betetako bilera horien ondoren.

Beraz, gustatuko litzaiguke jakitea Foru Aldundiaren asmoa zein den… Berdintasunean aurrera egi nahi badu kirol munduan nola egin behar du? Zein pauso eman behar ditu? Badirudi argi dagoela erantzuna… Aurrerapausorik ez!

EMAK (Emakume Kirolarien Taldea)