Pasa den ostiralean, haize erauntsiak gogor kolpatu zuen Euskal Herria Zuzenean (EHZ) jaialdia. Heletan (Nafarroa Beherea) muntaturiko azpiegiturek kalte handiak jasan zituzten, eta antolatzaile eta ehunka laguntzaileren lanari esker larunbatean jaialdia berrabiaraztea lortu zen arren, festibalak 200.000 euro inguru galdu ditu aurten. "Gure nahikeria da festibalarekin jarraitzea, baina gure geroa neurri batean erakundeen esku dagoela erran beharra dago", adierazi du Eneko Gorri EHZko komunikazio komisioko kideak. Orain arte, EHZ autofinantzamenduaren espirituarekin mugitu dela azpimarratu dute antolatzaileek, baina ostiraleko ekaitzak kinka larrian utzi duela jaialdia.