Mexikok bazuen fedea gaurko partidua irabazteko! Dos Santosek jokatu zuen lehen partidua ere, baina oraingoan, badaezpada, ondoan Vela jarri diote. Lehen txitxarritoa Chicharito Hernandezek sartu du eta frantziarrak zuri-zuri utzi dituen gola berriz, Blancok. (Izan kontu, hasierako hamaikakoan, zortzi jokalari Sarkozy baino beltzaranagoak zirela). Multzoko hurrengo partidua Mexiko eta Uruguayren artekoa da eta berdinketarekin bi taldeak pasako lirateke.

Hego Koreak Argentinaren aurrean belaunikatu behar izan du lau gol jasota eta ezin izan du final zortzirenetarako hegaldiarekin jarraitu. Alegia, hegoak moztu dizkiola Argentinak. Baina Hego Koreari hegoak moztuz gero, zer litzateke, Korea bakarrik? Hego gabe? Zalantzarik ez duena da, Argentina dela final zortzirenetara sailkatu den lehen taldea bere aurrelariei esker. Demichelisen hutsa ikusiz gero, ulertuko duzue zergatik ez ditudan atzelariak aipatzen. Nahiko txiste bada gola bera. Maradonaren eskua ere antzematen da. (Ez du alferrik jainkoaren eskua) Jokalariekin tratu berezia du eta adibidez, 75. minutuan, Kun Agüero sartu duenean eta Tévez kendu, aldaketaren aurretik galdetu dio Maradonak: ¿cómo Te vez? 

B multzoko beste partiduan Nigeriarrak aurreratu dira Ucheren golarekin, beraz, esan daiteke, gaur ez duela Uche-gin. Greziak buelta eman dio markagailuari, baina zenbakiak alderantziz ikusten zirenez, berriz lehen bezala utzi dute. Eta bai, 2 eta 1 ere irabazi dute. Dena den, nire ustez, Greziak gehiago zaindu behar du taldeko jokoa, jokalari batzuk berekoiegiak baitira. 18 zenbakia adibidez: Ninis. Izenean bakarrik antzematen zaio. 

Amaitzeko, galdera bat daukat: Nork idazten du Grezia “LL” hizkiarekin? Kontua da, gaurko gaztelerazko komentarista bati entzun diodala, Greziari erreferentzia eginez: “con junto L no”. Eta ez dut ulertu. 

Inork azaltzerik badu, pozik irakurriko ditut zuen iruzkinak.

Mexiko 2-0 Frantzia