"Zenbait estereotipotatik ihes egin dut"

  • Zuloak taldeak emandako azken kontzertutik urtebetera, bakarkako ibilbideari ekin eta lehen diskoa aurkeztu digu Tania de Sousak: Tania Tank (Talka Records, 2014). Lan eklektiko eta anitza egin du Zuloak taldeko abeslari ohiak, rock kutsua galdu gabe baina pop eremura jauzi ausarta eginez, batzuek espero zutenaren kontra. Musika eszenan luzaroan gelditzeko asmoa igartzen zaio.

Tania de Sousa (eskuinean) eta bere taldekideak. Ezkerretik hasita, Ander del Sol, Maitane Alonso eta Fermin Bouza.
Tania de Sousa (eskuinean) eta bere taldekideak. Ezkerretik hasita, Ander del Sol, Maitane Alonso eta Fermin Bouza.

Tania Tank diskoarekin ekin diozu zure bakarkako ibilbideari, nolakoa da aurkezpen hau? Bilatzen zenuena aurkitu duzu?

Oso zaila da bilatzen duzuna aurkitzea, baina uste dut lehen baino gertuago nabilela. Nire soinua ateratzen ari dela uste dut, nire ahotsa den bezalakoa da diskoan, artifiziorik gabekoa. Musika aldetik ere mugak apurtu ditut, edozertan ausartzen naizelako, eta niretzat plazer bat da.

Kolaborazio apartak izan dituzu: Mursego, Mikel Aizpuru, Koldo Soret, Xabier Solano, Fermin Muguruza... Musikariok ondo ezagutzen dituzu gehienak.

Bai. Egia esanda, horrelako kolaborazioek kolorea ematen diote lanari. Zorte handia izan dut horrelako jendea nirekin aritu delako. Musikari apartak direlako eta kantek beste dimentsio bat hartzen dutelako.

Disko hau tarteko, iraultza ala bilakaera izan da zure musika ibilbidean gertatu dena?

Argi dago nire ibilbidean aldaketa handia gertatu dela, orain arte egin dudanarekin alderatuta. Sekulako askatasuna eman dit jauzi hori egiteak. Azkenean, zenbait estereotipotatik ihes egin dudalako, eta nire soinuaz jabetu naizelako.

Proiektua zeurea bada ere, taldea ere osatu duzu disko honetarako, Maitane Alonso (baxua), Fermin Bouza (gitarra) eta Ander del Solekin (bateria). Zein izan da euren ekarpena diskoan?

Fermin Bouza funtsezkoa izan da disko honetan, hari pasa nizkiolako nire kantak konposatu nituenean. Berak landu egin zituen, eta diskoan entzuten den azken soinua eman die. Bestalde, Maitanek estilo oso berezia dauka baxua jotzean, teknika ederki menderatzen du eta eskenatokian presentzia handia du. Ander oso elegantea da, egurra ematen dio bateriari. Uste dut talde polita sortu dugula.

Punk-rock-etik Pop-rock-erako urratsa eman duzu, ahotsak ere beste tratamendu bat dauka, melodikogoa da.

Bai. Lehen aipatu dudan bezala, artifiziorik gabe ageri da. Azkenean nire lekua aurkitu dut, ez dut ahotsa behartu beharrik, horixe baita nire ahotsa. Poperako ahots aproposa daukat eta hori indartu behar dut.

Urtea joan da Zuloak emandako azken kontzertutik. Denbora tarte horretan bi disko plazaratzeko denbora izan duzu, The Dispositives-ekin egindakoa batetik, eta oraingo bakarkako disko hau. Sormenak ez du krisirik.

Tira, ez pentsa, kosta egiten zait kantak konposatzea, edo ondo dagoena baloratzea. Zerbait egiten dudanean ontzat hartzea sekulako ahalegina da niretzat. Erdipurdiko lan asko egin behar du artistak merezi duen kanturik sortzen duen arte.

Talka Records argitaldariak editatu du Tania Tank. Zure leku naturala horixe dela dirudi. Ferminek berak ere gomendatu zizun bakarkako ibilbideari ekiteko.

Bai, egia esanda sostengu hori izan ez banu ez dakit non egongo nintzatekeen. Argi dago izaten ari naizen proiekzioa Fermini eta bere lan-taldeari esker dela, eta bizitza osoan esker ona besterik ez dut izango haientzat.

Musikari bezala, non ikusten duzu zure burua hemendik hainbat urtera?

Musika egiten jarraitzea espero dut. Oso mundu zaila da, eta dena okerrera doa, nahiko ezkorra naiz, baina tira, itxaropena da galtzen den azkena.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude