Gezurra badirudi ere, izotzak harrapatu duen sail batean izan litekeen aurkaririk handiena eguzkia da. Izotzak landarearen gainean eta barruan urak izoztu eta hormatu ditu. Zuzenean lehenengo eguzkiak jotzen badu izotza bat-batean urtuko da, landareari egokitzeko denborarik eman gabe. Landareak izotz hormatik eguzkitara igarotzeko denbora tarte bat izatea askoz ere hobea da, tenperatura aldea eta ura izotz izatetik urtzerako tarteko aldaketa hobeto eramango baitu. Hotzarekiko landare sentiberenak, minberenak, ez jarri goizeko lehen eguzkiak harrapatuko dituen tokian. Izotzetik eguzkitarako bat-bateko aldaketarekin gehiago sufrituko dute. Geroxeago eguzkiak joko dituen tokian jarri, giro aldaketa xamurragoa den tokian.