Tebasko Batailoi Sakratuaz harro

Keroneako gudu zelaian Filipo II.ak eta Alexandro Handiak Tebasko Batailoi sakratuaren omenez eraikitako lehoia.
Keroneako gudu zelaian Filipo II.ak eta Alexandro Handiak Tebasko Batailoi sakratuaren omenez eraikitako lehoia.

Keronea (Grezia), K.a. 338. Filipo II.a Mazedoniakoak eta haren seme Alexandro Handiak Keroneako gudua irabazi zuten eta, horrenbestez, Greziako hiri-estatuek independentzia galdu zuten. Mazedoniarren ejertzito indartsua ikusita, arerio gehienek ihes egin zuten, baina 300 bat soldaduk, inguratuta, inolako aukerarik gabe, hil arte eustea erabaki zuten. Plutarkoren hitzetan: “Garaipena lortuta, Filipok gorpuei erreparatu zien, eta zera galdetu zien: zein dira besarkatuta, heriotzan eta maitasunean batuta dauden hildako hauek? Tebasko Batailoi Sakratua, Laioren leinuko gizonezko maitale eta maitatuak, erantzun zioten. Eta Filipok esan zuen: hil dadila gizon hauek zerbait oker egin edo sufritu zutela susmatzen duen oro!”

Antzinako Grezian harreman homosexualak onartuak zeuden, eta ohikoak ziren ejertzitoko kideen artean. Hainbat militar ezagunek gizonezko bikoteak izan zituzten –Teronek, Harmodiok, Aristogitonek edo Alexandro Handiak berak–, eta heroi mitologikoren bati ere egotzi zizkioten harreman homosexualak. Akilesi, esaterako.

Tebasko Gorgidas komandanteak ohitura hori sistematizatu zuen eta Tebasko Batailoi Sakratua osatu zuen 150 bikote homosexual bilduta. Bikotekide batek esperientzia handiagoa izaten zuen, eta Heniochoi (gidaria) zeritzon; bestea gazteagoa izan ohi zen eta Paraibatai (lagun) esaten zioten.

Batailoia greziar infanteriako elite taldea izan zen 33 urtez, eta berehala soldaduen adoreagatik egin zen ezagun. Honela azaldu zuen Plutarkok indar horren sekretua: “Tribu edo familia bereko gizonen artean adorea eskasa izan ohi da, arriskuak estutzen dituenean; baina maitasunean oinarritutako laguntasunak sendotzen duen batailoia ez da inoiz hautsiko eta menderaezina da; maitaleak maitatuen aurrean eta maitatuak maitaleen aurrean duintasuna galtzeko beldur baitira, eta arriskuari gogotsu aurre egiten baitiote, batzuk eta besteak lasaitzeko”. Baina dena emateko prest dagoenak dena galtzeko arriskua du, eta horixe gertatu zitzaien 300 soldaduei Keronean.

1924an Keroneako gudu zelaian industen ari zirela, arkeologoek harrizko lehoi bat aurkitu zuten, eta haren inguruan, 254 gorpuren arrastoak. Filipo II.ak eta haren seme Alexandrok hildakoak ehorztarazi zituzten eta, haien omenez, lehoiaren monumentua eraikiarazi zuten. 1969ko ekainaren 28an Stonewalleko istiluek gay harrotasunaren mugimendua abiarazi baino 2.300 urte lehenago, maitale homosexual talde batek etsaiak ere harrotasunez bete zituen.
 


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude