Bilbo “Bilbao” denetik askoz hobeki doa mundua.

Ez dakigu “Bilbo” euskara, gaztelera, edo hibrido arraro bat den. Utz dezagun “Bilbao”, eta suposatu dezagun euskara dela.

Zure euskara mailak liluratuta nauka.

Euskara da nire ama hizkuntza. Galdu nuen arren nire buruan dago, eta hil aurretik berreskuratu nahi nuke. Gaur egungo politikari batek derrigorrez jakin behar luke euskaraz.

Egia izango da Egibar eta zu alderdi berekoak zaretela!

Batzuei sinesgaitza zaien arren, hala da. Biak gara abertzaleak, biek sinisten dugu euskal nazio eta aberrian, eta hortik aurrera... Ulertuko duzunez 68 urterekin ez daukat aldatzeko asmorik. Errenkarnazioan, agian...

68 urte, adin ederra... erretiratzeko.

Frankismoan, Bilbaoko alkatetzan hamasei urte eman zituen batek. Nik marka hori demokrazian hautsi nahiko nuke. Ilusiorik falta ez zaidanez, herritarrek jubilatzen nauten ikusi nahi dut. Txarto iruditzen?

Politikariak oso gaizki baloratuta zaudetela iruditzen zait niri.

Politikan, jakintzaren beste adar batzuetan bezala, jende mediokre asko dabilelako da hori. Urrezko aroak ezagutu ditugu baina gizarte mediokre batean bizi gara.

Hori da hori autokritika egitea!

Jaurlaritzan nengoenean ez neukan gaur jendearekin daukadan tratuaren %10a, Madrilen banengo ez nuke %1a ere izango, eta Europan ez duzu hiritarrik ikusten bizitza guztian. Hori hala, ez diotsut dena ondo egin dudanik, gaizki zer egin dudan ez galdetzeko baizik.

Hauxe da konpartsei buruz hitz egiteko unea, beraz?

Jaietan jaia egin behar da, ez politika. Hori hala den artean denak ados gaude eta ez dago arazorik.

Jakina, zuk txosnekin egiten duzuna ez da politika.

Eclesiastes-zalea bazara eta sortzea, haztea, eta ugaltzea politikan sartzen badituzu, bestela esango dizut. Ez dezatela alderdikeriaz jokatu eta politikilla-rik egin. Gainontzean, asteazkenean atseden hartzea primeran iruditu zitzaidan. Ostegunean indartsuago zeuden.

Katalunian zezenketak debekatzen dituen legea politikilla da zuretzat?

Nik ez dut inoren kontra egingo, Bilbaoko zezenketen alde baizik. Sekulako tradizioa dago, sekulako aberastasuna da hiriarentzat, eta ez dut jairik irudikatzen zezenketarik gabe. Oso zaila da legez horrekin amaitzea.

Ai, ai, ai... Mentalitateak Bilbao bezain arin aldatuko balira...

Itsasadarrari bizkarra ematetik itsasadarrarekin bizitzera pasa garenetik, etxeko oinetakoekin atera daiteke paseatzera. Ez zegoen besterik, eraldatu ala hil.