Begiak itxita

I
Bakardadea bihurtu
denetik nire senar,
ohe hau da itzali den
desioaren kedar.
Bakarrik oheratzea
bada nahiko ezbehar
baina urguilua dut ta
ez dut egingo negar.
Hutsune baten maitale
maindireetan zehar,
amets egiteko ez da
konpainiarik behar. (bis)
II
Uste nuenean inoiz
ez zela iritsiko,
sarrailako giltza hotsak,
ordubatak ta piko.
Lo plantak egin eta dut
ametsetan segiko,
begiak itxiko ditut
eta nola itxiko.
Nik ez diot galderarik
egingo eta kito,
ez du gezur bat erantzun
beharrik edukiko. (bis)
 
III
Hanka puntetan sumatu
dut airean bezala
ilunpean gerturatzen
ixil bere itzala.
Behatzekin laztandu dit
goxo larruazala,
nire ezpainen gorria
topatuz berehala.
Muxu bat oparitu dit
baina muxu hutsala,
denbora asko da muxu
ematen ez didala. (bis)
IV
Begiak zabaldu ditut
juxtu une horretan,
muxu ematen ahaztu
zitzaien ezpainetan.
Nahiz ez duen emakume
lurrinik arropetan,
nahiz ez duen karminezko
orbanik kamixetan.
Galdetu gabe badakit
non egon den ta zertan,
bere argazkia dauka
zintzilik begietan. (bis)
 
V
Ez dakit nolakoa den,
ez dit ezer kontatu,
agian da prestigio
handiko abokatu;
kurba perfektuenekin
jantzitako pekatu;
agian da zerbitzari,
enpresari prestatu,
falta zaiona norekin
eta zertan gastatu,
baina nik baino gehiago
ezingo du maitatu. (bis)
VI
Ohea hain da handia
bera ez dagoela,
izarak hain dira hotzak
ta bera hain epela.
Jakinagatik maitale
baten maitale dela,
aukeratzeko ez diot
eskatuko bestela,
badaki badakidala
badakit dakiela,
bat hautatzekotan bera
hautatuko duela. (bis)
VII
Amesteko, sentitzeko
askeak izatean,
isiltasunak handitu
ohi duen tik-tak-ean
badirudi atzerako
kontaketa batean
sartzen dela maitasuna
gure izarapean,
goxo hartu banau ere
bi besoen artean,
beste batekin amesten
ari da bitartean. (bis)
VIII
Amesteko, sentitzeko
askeak izatean,
isiltasunak handitu
ohi duen tik-tak-ean
badirudi atzerako
kontaketa batean
sartzen dela maitasuna
gure izarapean,
goxo hartu banau ere
bi besoen artean,
beste batekin amesten
ari da bitartean. (bis)
   

2010ea, Lazkao Txiki XIX. Bertsopaper Lehiaketako sorta irabazlea.
Doinua: “Gai honek badu mamia”.

Bidali zure sortak bertsoak@argia.eus helbidera. Aukeratuak orri honetan argitaratuko ditugu.

Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude