1873tik 2008ra munduan izandako krisialdi ekonomiko nagusiak bildu ditu Carlos Marichal historialariak Nueva historia de las grandes crisis financieras izenburuko lanean (eskuinean, liburuaren azaleko argazkia). Ikerketaren tesi nagusia krisialdiak aldian-aldian errepikatzen direla eta, beraz, aurreikus daitezkeela da. Krisien aurreko oparoaldietan, ordea, inork ez du horrelakorik gogoan eta atzeraldia iragartzen dutenei ez zaie jaramonik egiten; esaterako, Paul Krugmanek 1999an eman zuen egungo deskalabruaren abisua. Hala, krisialdi hau gainditzean, ziurrenik memoria lausotu egingo zaigu berriro.