Aste honetan, Barakaldoko Bilbao Exhibition Center makina-erremintaren munduko erakustokia izango da, han egingo baita maiatzaren 31tik ekainaren 5era Makina-erremintaren Biurtekoa, Euskal Herriko azoka garrantzitsuenetakoa. 24 herrialdetako 1.024 enpresa ordezkatuko dituzten 500 erakusketetan produktu berritzaileenak erakutsiko dituzte. Biurtekoa hasterako 54 herrialdetako 45.000 bisitarik emana zuen izena. Datu horiek adierazten dute erakustoki honen garrantzia, ahaztu gabe munduko krisi ekonomiko finantzarioak sektore horri eragin diola. Sektorea esportatzailea da nagusiki, 2009ko ekitaldian produkzioaren %74,1. Horregatik, munduko gainerako lekuetan krisia baldin badago, Euskal Herrian ezarritako sektoreak –bereziki Gipuzkoan eta Bizkaian–, kolpea zuzen eta segituan jasotzen du.

Sektoreak urterik txarrena 2009a izan zuen, eskaera %66 jaitsi zen. 2008an 1.056 milioi euroko produkzioa izan zuen eta 2009an 745 milioi eurokoa. Krisia enpleguan nabaritu zen, sektoreko enpresek mahai gainean jarritako hogeita hamar bat espedienteren ondorioz enpleguaren %8 deuseztatu baitzen. Aurten krisiaren ondorioak jasaten segituko du sektoreak, nahiz eta antza denez, 2011tik aurrerako itxaropen zantzuak dauden. Hargatik, Makina-erremintaren Biurtekoa aukera ona izan liteke bilera komertzialak nahiz kontaktuak egin eta sektorearen egoera larria arintzeko, bai eta puntako euskal sektore honen eta bere enpleguaren bideragarritasuna egonkortzen eta bermatzen lagunduko duten negozio bide berriak irekitzeko ere.