Nondik etorri zen izenaren ideia?
Etxalarko zerri hiltzailea da nik ezagutu dudan lehenengo Benito jauna. Horrez gain, Mikel Lertxundi bateria eta biek bromatan ibiltzen ginen Benito Lertxundiren inguruan eta horrela sortu zen izena.
Hainbeste proiektutan murgilduta zaudenean, ezinbestekoa da ganberroarena egitea?
Nire kasuan hala da, adinaren krisi ttikia pasata ganberroarena egiteko gogoa sartu eta primeran pasatzeko proiektua sortzea pentsatu genuen. Entzuleari hori transmititzen saiatzen gara eta oraingoz harrera hagitz ona da. Ongi pasatzeaz gain, musikalki zerbait berezia egin nahi dugu; euskara lagun dugula, blues musika pixka bat mareatu.
On Benito musika estiloz guztiz irekia da?
Ez diogu gure buruari inongo mugarik jarri nahi, gehienez proiektuak blues ukitu bat edukitzea, baina bertzela edozein instrumentu erabili eta edozein erokeria egiten dugu.
Disko hau sorpresa kaxa da hasieratik bukaera arte. Bazegoen gidoirik?
Grabatzen hastean zortzi kanta-ideia genituen, baina konturatu ginen kantek norabide argirik ez zutela. Behin oinarriak grabatuta genituela, lokalera bueltatu ginen gauza desberdinak probatzeko asmoarekin. Hor hasi zen benetan forma hartzen diskoa, jolasean ibili ginen inongo presa eta gidoirik gabe gustuko emaitza lortu arte.
Zalantza bat: indioak Berako Aduanaraino heldu ziren?
Zuberoako indioak bai! Kantuz aditu eta diskoan parte hartzeko gonbitea egin genien!
Noiz jarriko da martxan Atom Rhumba? Eta zer puntutan geldituko dira zure beste proiektuak?
Atom Rhumbarekin apirilean hasiko gara kontzertuak ematen kanta berriak neurtzeko, udan diskoaren grabazioa eginen dugu. Nire proiektu pertsonalak segur aski azkenerako utziko ditut, baina aterako dut denbora aitzinera eramateko. n